इटहरी : हँसिलो र गहुँगोरो अनुहार । इटहरीदेखि उत्तर तरहरा, धरानसम्म विहानको चिसोमा दैनिक साइकल चलाउँदै आइपुग्छन् एकजना बालक । न जाडो, न घाम, न पानी । उनको दैनिकी साइकलको चक्कासँगै घुमिरेहको हुन्छ ।
उनी हुन् विराटनगर घर भएका इटहरी निवासी अमरत्र्य शर्मा । उमेरले दश वर्ष मात्रै पुगेका उनले दुई वर्षको उमेरदेखि नै साइकल चलाउँन सुरु गरे ।
‘दुई वर्षको हुँदादेखि नै साइकल चलाउँन थालेको हुँ,’ उनले सुनाए, ‘म बा को फोटो हेरेर, बा सँगै साइक्लिङ गर्न थालेको हुँ ।’ उमेरले बचपन नै भएपनि उनमा साइक्लिङ गर्दाको अनुभव बुढापाकाको भन्दा कम छैन ।
कहिले इटहरीदेखि कान्छीचौक हुँदै चतरासम्म त कहिले धरानसम्म साइकलमा आफ्ना बा, आमासँग पुग्छन् ।
‘आफैँले साइक्लिङ गरेर मोरङको लेटाङ हुँदै धरानको पानमारासम्म पनि निस्किएको छु,’ उनले टाकुरासँग भने, ‘मेरो सानैदेखिको सोख नै साइकल चलाउने थियो ।’ उनले आँफूले दीर्घकालीन समयसम्म साइकल नै चलाउने बताए ।
कक्षा पाँचमा अध्ययन गर्दै गरेका अमरत्र्य दैनिक ४० किलोमिटरसम्म साइकल चलाउँछन् । उनी भन्छन्, ‘मलाई साइकल चलाउँदा जस्तो मज्जा अरु केहीमा पनि हुँदैन, म साइकलमा जहिँ पनि पुग्छु जस्तो लाग्छ ।’ उनले आँफूलाई साइकल चलाउँदा जत्तिको रमाइलो अरु कुनै काम गर्दा पनि नहुँने तर्क गरे ।
पछिल्लो समय प्रविधिले फड्को मार्दै गएको छ । यसै सन्र्दभमा कतिपय बालबालिकाहरुलाई प्रविधिले सकारात्मक बाटोमा लम्किन पनि उत्प्रेरित गरेको छ भने कतिपय अवस्थामा इन्टरनेटको दुरुपयोगका कारण धेरैजसो बालबालिका सानै उमेरदेखि डिप्रेसनमा पर्दै आएको कुरा पनि विद्यमान छ ।
तर, अमरत्र्य भने आँफूलाई मोबाइलमा ग्याम खेल्न वा इन्टरनेट प्रयोगमा मात्रै केन्द्रित हुनुभन्दा अलिक पर रहेर साइक्लिङ गर्दै आएका छन् । साइक्लिङ गर्दा दैनिक कार्बनडाइअक्साइड पनि उत्पादन नहुने र शरीर पनि फुर्तिलो हुने गरेकाले पछिल्लो समय केटाकेटीदेखि वयस्क उमेरकाले पनि साइक्लिङ गर्दै आएका छन् ।
केही साता अगाडिमात्रै पश्चिम महाकालीदेखि पूर्वी नेपालको इलामसम्म साइक्लिङमा आएका विश्व साइकलयात्री पुष्कर शाहसँग धरानदेखि विराटनगरसम्म अमरत्र्य सँगै साइक्लिङ गए ।
करीब ४५ किलोमिटर दूरी पार गरेका उनलाई अझै पनि साइकल चलाउँन मन थियो, तर रात भइसकेकाले त्यसदिन उनले त्यतिमै आफ्नो दैनिकी बिट मारे । उनी दिउँसोको मध्य घाममा निरन्तर साइक्लिङ गर्दा महाकालीदेखि आएका साइकलयात्रीले उनको मुक्तकण्ठले प्रशंसा गरेका थिए ।
कहिलेकाहीँ अन्य समयमा विराटनगरमा आफ्नो परिवारलाई भेट्न जानुपरेमा पनि साइक्लिङ नै प्रयोग गर्दै आएका छन् ।
‘हामीले हरेक दिन घरदेखि काममा जादाँ मात्रै पनि साइकल चलाउँने हो भने हरेक कुरामा फाइदा हुन्छ,’ विश्व साइकल यात्री पुष्कर शाहले भनेको कुरा सम्झदैँ अमरत्र्य भन्छन्, ‘पुष्कर अंकलले भनेजस्तै हामी भोलिका दिनमा डाक्टरकोमा उपचार गर्न जान नपरोस् भन्नका लागि पनि साइक्लिङ गर्नु आवश्यक छ ।’
विश्व साइकलयात्री शाहले केही दिन अगाडि इटहरी आएर एक कार्यक्रमका बीच भनेका थिए , ‘दैनिक साइकल चलाउँदा पेट्रोल पनि आवश्यक नपर्ने भएका कारण कार्बनडाइअक्साइड उत्पादन हुँदैन, त्यसकारण पनि जीवन सहज हुन्छ ।’
उनले दैनिक साइकल चलाउँदा व्यायाम हुने भएकाले भएकाले स्वास्थ्य सहज हुने तर्क गरेका थिए । स्वास्थ्य सहज भएको अवस्थामा दीर्घकालमा स्वास्थ्य चौकी पनि जान नपर्ने उनको भनाई थियो ।
शाहको तर्कप्रति अमरत्र्य सकारात्मक रहँदै आँफूपनि कुनैदिन नेपाल भ्रमण साइकलबाटै गर्ने लक्ष्य लिएका छन् ।
अमरत्र्य जस्तै कलिलो उमेरका बालबालिकाहरु पछिल्लो समय इन्टरनेटमा मात्रै व्यस्त रहेका छन् ।
इन्टरनेटको सदुपयोगले भने आम मानिसलाई धेरै सकारात्मक बाटोमा पहिल्याउन सहज भएको छ । तर, यसको दुरुपयोगका कारण नकारात्मक कुरामा मात्रै केन्द्रित हुने गरेको पनि पाइन्छ ।
अमरत्र्य जस्तै अन्य अमरत्र्यहरुले दैनिक साइक्लिङ गरेमा स्वास्थ्य सहज सँगै सृजनशील हुने अनुमान गर्न सकिन्छ ।
Discussion about this post