तरहरा : इटहरी २० तरहरामा बिहीबारदेखि फुटसल प्रतियोगिता हुने भएको छ । दुईदिनसम्म चल्ने प्रतियोगिताको विजेता टिमले नगद एक लाखसहित ट्रफी, मेडल र प्रमाणपत्र प्राप्त गर्ने आयोजकले जनाएको छ ।
बुधबार पत्रकार सम्मेलन गरी आयोजक मर्निङ फुटसल क्लब तरहराले प्रतियोगिताबारे जानकारी दिएको हो । कुल २६ टिम सहभागी रहेको र राष्ट्रियस्तरको प्रतियोगिता आयोजना गरिने आयोजक कमिटिका अध्यक्ष चन्द्रकाजी गुरुङ (कालु)ले जानकारी दिए ।
उनका अनुसार प्रतियोगितामा प्रथम र द्धितीय हुने टिमले क्रमशः नगद एक लाख र पचास हजार प्राप्त गर्नेछन् । यसैगरी बेस्ट गोल किप्पर र सर्वाधिक गोलकर्ताले नगद पाँच हजारसहित मेडल प्राप्त गर्ने उनले बताए ।
स्वास्थ्यमा सचेत हुनसँगै यहाँका युवाहरूलाई कुलतमुक्त बनाउनका निम्ति उक्त प्रतियोगिता आयोजना गर्न लागेको उनको भनाइ छ ।
खेल संयोजक सन्तोष श्रेष्ठले प्रतियोगिताबाट बचेको रकमले तरहराको पानीपियास्थित शव दाह गृह नजिकै खानेपानीको धारा जडान गरिनेछ ।
‘हामीले एक लाख बराबरको धारा जडान गर्ने लक्ष्य लिएका छौँ,’ श्रेष्ठले भने, ‘प्रतियोगिताबाट उब्रिएको रकमले खानेपानीको धारा जडान गर्दा मलामीका लागि धेरै सहज हुनेछ ।’ यस क्षेत्रमा आउने मलामीजनका लागि खानेपानीको धाराले सहज हुने र इटहरी–धरानको बाटोमा यात्रा गर्नेहरूलाई पनि उक्त धारामा पानी पिउने मिल्ने उनको भनाइ छ ।
यसअघि तरहरामा वडास्तरीय प्रतियोगिता भएपनि यस वर्ष आफूहरूले राष्ट्रियस्तरको प्रतियोगिता आयोजना गर्न लागेको श्रेष्ठको भनाइ छ । उनका अनुसार प्रतियोगितामा कुल तीन लाख पचास हजार खर्चको अनुमान गरिएको छ ।
बिहीबार बिहान ७ बजे उद्घाटन हुने प्रतियोगिताको समापन शुक्रबार दिउँसो हुने तयारी छ । कुल २० मिनेटको प्रतियोगितामा सुनसरी, मोरङ, झापा र काठमाडौँबाट खेलाडीहरू सहभागी हुने आयोजकले जनाएको छ ।
साथै, उक्त प्रतियोगिताको अवसर पारेर खेलकुदको माध्यमबाट तरहरालाई देशव्यापी रूपमा चिनाउन भूमिका खेल्ने खेलाडीहरूलाई सम्मानसमेत गरिनेछ ।
तेक्वान्दो प्रशिक्षक कुमार गुरुङ, सितोरियो कराते प्रशिक्षक मनकुमार राई, म्याराथुन धावक मीनकुमार खवास, साफ गोल्ड मेडलिस्ट कन्याम लिम्बू र तेक्वान्दो खेलमा स्वर्ण पदक विजेता सुशीला राईलाई सम्मान गरिने संयोजक श्रेष्ठले बताए ।
Discussion about this post