इटहरी : कोशी प्रदेशका तीन जिल्ला सुनसरी, मोरङ र झापामा ट्रान्सफर्मर चोरी गर्दै आएका गिरोहलाई प्रहरीले पक्राउ गरेको छ ।
प्रदेश प्रहरी कार्यालय विराटनगरले मंगलबार पत्रकार सम्मेलन गरी २२ वटा ट्रान्सफर्मर चोरीमा संलग्न रहेकाहरूलाई सार्वजनिक गरेको हो ।
प्रहरीका अनुसार पछिल्लो माघ १५ गतेदेखि मोरङमा ८ स्थान, सुनसरीमा १२ र झापामा २ स्थानमा ट्रान्सफर्मर चोरी भएका थिए ।
प्रहरीले ट्रान्सफर्मरभित्रको तामा निकालेर बिक्री गर्दै आएका गिरोहका सदस्यहरूलाई निगरानीपछि पक्राउ गरेको हो ।
पक्राउ पर्नेहरूमा मोरङको ग्रामथान–४ का ४२ वर्षीय अर्जुनकुमार माझी (चौधरी), ग्रामथान–५ का ३१ वर्षीय इरज धामी, सुनसरी दुहबी–३ का ३५ वर्षीय अनुज विश्वास (चौधरी), दुहबी–२ का ३९ वर्षीय प्रयागकुमार खाँ चौधरी, मोरङ बेलबारी–४ का २६ वर्षीय अर्जुन चौधरी, बेलबारी–३ का २७ वर्षीय रञ्जित तामाङ र भारत घर भई दुहबी–४ स्थित ससुराली घरमा बस्दै आएका ३४ वर्षीय आलम मियाँ छन् ।
त्यस्तै चोरी गरिएको तामाको तार किन्ने आरोपमा विराटनगर महानगरपालिका–३ का ५३ वर्षीय लक्ष्य प्रधान, विराटनगर–६ का ६२ वर्षीय कृष्णगोपाल ताम्राकार, दुहबी–३ का ३२ वर्षीय योगेश अग्रवाल, दुहबी–२ का ३१ वर्षीय कपिल भट्ट र इटहरी–४ का ३९ वर्षीय सीताराम राईलाई पनि प्रहरीले पक्राउ गरी सार्वजनिक गरेको छ ।
कोशी प्रदेश प्रहरी प्रमुख डीआइजी ईश्वर कार्कीका अनुसार पक्राउ परेका अभियुक्तहरूले करिब दुई करोड रुपैयाँ बराबरका ट्रान्सफर्मर चोरी गरेका थिए ।
चोरीमा प्रयोग गरिएका २२ थान डायल रेन्च, ३ थान सलाई रेन्च, ३ थान पिलास, ३ थान पेचकस, १ थान छिनो, १ थान साङली, १ थान कैची र ३ थान ह्याक्सो ब्लेड बरामद गरिएको प्रहरीले जनाएको छ ।
यसबाहेक १ वटा पिकअप गाडी र ५ वटा मोटरसाइकल समेत नियन्त्रणमा लिइएको छ । पिकअप गाडी को १ च ७७२९ र मोटरसाइकलहरू प्रदेश १–०२–०५० प ७०९५, प्रदेश १–०२–०५६ प ५५८०, को २ प ९२९०, प्रदेश १–०२–०५० प ३०४९ र को २९ प ४५४४ नम्बरका छन् ।
डिआइजी कार्कीका अनुसार साउन ९ गते मात्रै मोरङको रंगेली नगरपालिका–९ स्थित इटाभट्टा टोलमा ट्रान्सफर्मर चोरी गर्न गएका अर्जुनकुमार माझी पक्राउ परेपछि अनुसन्धान सुरु गरिएको थियो ।
अनुसन्धानका क्रममा गिरोहको संलग्नता रहेको पुष्टि भएको हो । जसअनुसार मोरङ, सुनसरी र झापा जिल्ला प्रहरी कार्यालयसँग समन्वय गर्दै प्रदेश प्रहरीको विशेष टोली खटिएको थियो ।
प्रहरीले घटनासम्बन्धी थप अनुसन्धान अगाडि बढाएको जनाएको छ ।
Discussion about this post