झापा : झापाको दमकस्थित इलाका प्रहरी कार्यालयमा गत भदौ २४ गते जेन–जी आन्दोलनका क्रममा लुटिएका दुई थान हतियार पाँचथरमा फेला परेका छन् ।
प्रहरीले घटनामा संलग्न एक जनालाई पक्राउ गरी हतियार बरामदसहित थप अनुसन्धान सुरु गरेको छ।
जिल्ला प्रहरी कार्यालय झापाका अनुसार विशेष सूचनाका आधारमा दमक नगरपालिका–६ बाट पाँचथर मिक्लाजुङ गाउँपालिका–३ का २२ वर्षीय सुशील फियाक (लिम्बू) लाई पक्राउ गरिएको हो।
प्रारम्भिक सोधपुछमा उनले लुटिएका हतियार पाँचथरको मिक्लाजुङ–३ आरुबोटे लामागाउँ नजिकैको एउटा ओडारमा लुकाएर राखेको स्वीकार गरेका छन्।
त्यसपछि पाँचथर प्रहरीसँग समन्वय गरी प्रहरी निरीक्षक नवीन राईको नेतृत्वमा खटिएको टोलीले उक्त ओडारबाट म्याग्जिनसहित एक थान थ्री–नट–थ्री राइफल, तथा म्याग्जिन नभएको, बट र ह्यान्ड–ग्रिप जलेको अवस्थामा रहेको एक थान इन्सास राइफल बरामद गरेको छ।
साथै इन्सासको एक राउण्ड र एसएलआरको एक राउण्ड जंगी गोली पनि प्रहरीले नियन्त्रणमा लिएको छ।
प्रहरीले पक्राउ परेका फियाकलाई हातहतियार तथा खरखजाना सम्बन्धी कसूरमा इलाका प्रहरी कार्यालय दमकबाटकै थप अनुसन्धान र कारबाही अघि बढाएको जनाएको छ।
प्रहरीका अनुसार आन्दोलनका क्रममा हराएका अन्य हतियारको खोजी प्रक्रिया अझै जारी रहेको छ।
Discussion about this post