इटहरी : तेस्रो संस्करणको अन्तर कलेज टी–२० क्रिकेट प्रतियोगिताको उपाधि इटहरीस्थित विश्व आदर्श कलेजले जितेको छ ।
शनिबार इटहरीमा सम्पन्न फाइनल खेलमा विश्व आदर्शले नमुना कलेजलाई ५१ रनले पराजित गर्दै उपाधि हात पारेको हो ।
यसअघि प्रतियोगिताको पहिलो संस्करण जितेको विश्वआदर्श गत संस्करणको फाइनलमा विराटनगरको महेन्द्र मोरङ आदर्श बहुमुखी क्याम्पससँग पराजित भएको थियो ।
इटहरीस्थित जनता क्रिकेट खेल मैदानमा विश्व आदर्शले दिएको १ सय ५९ रनको लक्ष्य पछ्याएको नमुना कलेज १८ ओभरमै १ सय ७ रनमा अलआउट भयो । नमुनाका लागि बिपन शाहले सर्वाधिक ४७ रन बनाए । राजु विकले १८ र कृष्ण विष्टले १२ रन जोडे ।
अन्य ब्याटरहरू प्रभाव जमाउन असफल रहे । विश्व आदर्शका अनिष कुवँरले उत्कृष्ट बलिङ गर्दै ४ विकेट लिए । रोहन शाह र समीर तिम्सिनाले समान २–२ विकेट हात पारे ।
यसअघि टस जितेर पहिले ब्याटिङ गरेको विश्वआदर्शले निर्धारित २० ओभरमा ७ विकेट गुमाउँदै १ सय ५७ रन बनाएको थियो ।
टोलीका लागि रोहन शाहले सर्वाधिक ३७ रन बनाउँदा आकाश सर्राफले ३०, समीर तिम्सिनाले २५, आयुष ढुङ्गेलले १३ र रोशन खत्रीले १२ रनको योगदान दिए । नमुनाका तर्फबाट सुबित मेहताले ३ तथा राजु विकले २ विकेट लिए ।
फाइनल खेलको ‘प्लेयर अफ द म्याच’ विश्वआदर्शका अनीश कुवँर घोषित भए । प्रतियोगिताको विजेता विश्वआदर्शले नगद २५ हजार रुपैयाँसहित ट्रफी प्राप्त गरेको छ भने उपविजेता नमुना कलेजले नगद १५ हजार रुपैयाँमा चित्त बुझाएको छ ।
प्रतियोगिताको सर्वोत्कृष्ट खेलाडी विश्व आदर्शका कप्तान भूपाल लुइँटेल घोषित भए । अनिष कुवँर ‘बेस्ट बलर’ तथा रोशन खत्री ‘बेस्ट ब्याटर’ बने ।
विजेता तथा उपविजेता टोलीलाई प्रमुख अतिथि इटहरी–९ का वडाध्यक्ष जितेन्द्र थापा, विश्व आदर्श कलेजका प्राचार्य गणेश दुलाल, कोसी प्रिमियर लिग विजेता नमुना ब्लास्टर्सका धर्म न्यौपानेलगायतले पुरस्कार वितरण गरेका थिए ।
इटहरी आदर्श जाइन्ट्सको आयोजनामा पुस १९ गतेदेखि सञ्चालन भएको प्रतियोगितामा कोसी प्रदेशका झापा, मोरङ र सुनसरीका १२ कलेज टिमको सहभागिता रहेको थियो ।
Discussion about this post