इटहरी : कोशी प्रदेश सरकारले स्थलगत अनुगमनका क्रममा सञ्चालनमै नरहेको भेटिएका मोरङ र सुनसरीका नौ वटा सहकारी संस्थालाई खारेजी गर्ने प्रक्रिया अगाडि बढाएको छ।
प्रदेश सहकारी रजिष्ट्रार तथा प्रशिक्षण कार्यालयले पटक–पटक विवरण अद्यावधिक गर्न सूचना जारी गरे पनि सम्बन्धित सहकारी संस्थाले सम्पर्कमा नआएको र स्थलगत अनुगमन गर्दा अधिकांश संस्थाको कार्यालय सञ्चालनमा नरहेको पाइएपछि खारेजी प्रक्रिया सुरु गरिएको जनाएको छ।
खारेजी प्रक्रियामा परेका संस्थामध्ये मोरङका मोफसल प्रकाशन, कोशेली बचत, नवजागरण बहुउद्देश्यीय र युवा कृषि सहकारी रहेका छन्। त्यसैगरी सुनसरीका नीलकण्ठ कृषि, आरोग्य स्वास्थ्य सेवा, जब्दी महिला, आदर्श कृषि र तीनकुने महिला बचत तथा ऋण सहकारी रहेका छन्।
कार्यालयका अनुसार कानुनबमोजिम वित्तीय विवरण, वार्षिक प्रतिवेदन तथा अन्य अनिवार्य कागजात लामो समयसम्म नबुझाएका कारण ती संस्थालाई अन्तिम अवसर दिइएको थियो। तर, त्यसपछि पनि कुनै प्रतिक्रिया नआएपछि खारेजीको प्रक्रिया अगाडि बढाइएको हो।
प्रदेश सरकारले निष्क्रिय र अस्तित्वहीन सहकारी संस्थाको अभिलेख व्यवस्थापनलाई व्यवस्थित बनाउने तथा सहकारी क्षेत्रमा सुशासन कायम गर्ने उद्देश्यले यस्ता संस्थामाथि कारबाहीलाई निरन्तरता दिने जनाएको छ।
Discussion about this post