इटहरी (डेस्क) : धनकुटाको पाख्रीबास नगरपालिका वडा नं. १ मा एक मन्दिर निर्माणको क्रममा चरम लापरबाही भएको पाईएको छ ।
निर्माणाधिन रहेकोे नर्वदेश्वर शिवालय मन्दिरको काम पूर्ण नहुँदा अहिले लथालिङ्ग बन्न पुगेको हो ।
पाँच लाख बजेटमा निर्माण, मर्मतको काम सुरु भएको मन्दिरको रंगरोगन र गजुर लगाउँन बाँकी हुँदै काम रोकिएको हो । स्थानीयका अनुसार मन्दिर निर्माण सकिन लाग्दा पैसा नपुगेको भन्दै काम रोकिएको छ ।
मन्दिर निर्माण समितिका अध्यक्ष नारायण भण्डारी र सचिव दिनेश थापाले मन्दिर निर्माण भइसकेको भनेर नगरपालिकाबाट पैसा समेत निकासा गरिसकेका छन् ।
मन्दिर निर्माण भएको नक्कली फोटो पेश गरी नगरपालिकाबाट पैसा निकासा गरिसकेका उनीहरुले अहिले काम लथालिङ्ग बनाउँदा पनि स्थानीय प्रशासन मौन रहेको छ ।
‘पाँच लाखमा योजना अनुसार काम गर्दै गएको अवस्था थियो,’ पाख्रीबास नगरपालिकाका एकजनाले भने, ‘अहिले नगरपालिकाबाट समेत पैसा निकासा भइसकेपछि पैसा नपुगेको भनेर काम गर्न छाडियो ।’
पूर्व सचिव भीम उपाध्यायले सामाजिक सञ्जालमा एक फोटो पोष्ट गर्दै भनेका छन्, ‘धनकुटाको पाख्रीबास नगरपालिका १ स्थित रङरोगन र गजुरसहित फिनिसिङ सकेर वडाध्यक्ष समिति र इन्जिनियरले ५–६ महिना अगाडि पास गरेको शिवालय मन्दिर वर्तमान अवस्था दयनीय छ ।’
यस बिषयमा पाख्रीबास नगरपालिका १ का वडाध्यक्ष हेमबहादुर पाण्डेले भने काम नरोकिएको प्रतिक्रिया दिए ।
‘प्रदेश सरकारबाट मन्दिर मर्मतका लागि ५ लाख रुपैँया बजेट माग गरिएको हो,’ पाण्डेले टाकुरान्यूजसँग भने, ‘जति स्टेटमेन्टमा मर्मत लाग्ने योजना थियो, त्यो भन्दा बढी रुपैँया लाग्ने भएका कारण अहिले केही समयका लागि काम रोकिएको हो ।’
उनले मन्दिर मर्मतमा भ्रष्टाचार नभएको दाबी गर्दै गजुर, प्लाष्टर र रंगरोगनको काम बाँकी रहेको बताए ।
उनले फोन सम्पर्कमा भने, ‘मर्मतको पैसालाई निर्माण गरिएको हो, त्यहाँ भ्रष्टाचार भने भएको छैन ।’ उनले जनताको र समितिको केही रकम भने मन्दिर निर्माणमा परेको बताए ।
Discussion about this post