उदयपुर : उदयपुरमा डेढ वर्षदेखि प्रेम सम्बन्धमा रहेकी एक महिलाले आत्महत्या गरेकी छन् ।
जिल्लाको त्रियुगा नगरपालिका ३ घर भएका विष्णु देव पंजियार (प्रेमी) को घरमै गएर बेलका नगरपालिका २ करहैयाकी सावित्रा कुमारी चौधरी ‘महावती’ ले आत्महत्या गरेकी हुन् ।
जिल्ला प्रहरी कार्यालय उदयपुरका एसपी सुवासचन्द्र बोहराका अनुसार साउन २३ मा विष्णुदेवको घरमा गएकी सावित्राले भोलिपल्ट प्रेमीको घरमै आत्महत्या गरेकी हुन् ।
मृतकका बुवा देव नारायण चौधरीले पंजियारविरुद्ध जिल्ला प्रहरी कार्यालयमा उजुर गरेका छन् । मृतकको बुवाको उजुरीपछि आइतबार राति विष्णुदेवलाई प्रहरीले पक्राउ गरेको हो ।
विष्णु देव र सावित्राले ०७८ साउन १९ मा ‘श्रीमान् श्रीमतीको हैसियतमा बस्ने र लगन आएपछि विवाह गर्ने’ तमसुक गरेको प्रहरीको प्रारम्भिक अनुसन्धानबाट खुलेको छ ।
तर, विष्णु देव र अर्की युवतीको बीचमा पनि पाँच वर्षदेखि प्रेम सम्बन्ध रहेको थाहा पाएपछि सावित्राले आत्महत्याको बाटो रोजेको हुनसक्ने प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
Discussion about this post