इटहरी : सुनसरीको दुहबीबाट उत्पादन हुँदै आएको ‘गुडलाइफ’ ब्रान्डअन्तर्गतको ‘डाइजेस्टिभ नट्स’ बिस्कुटमा रौँ भेटिएको छ ।
जसकारण नियामक निकायले उद्योगलाई २ लाख रुपैयाँ जरिबाना गरेको छ ।
खाद्य प्रविधि तथा गुण नियन्त्रण कार्यालय, विराटनगर र वाणिज्य, आपूर्ति तथा उपभोक्ता संरक्षण कार्यालय, मोरङको संयुक्त टोलीले सुनसरीको दुहबीस्थित उद्योगमा छापा मारेर नमुना संकलन गरेको थियो ।
प्रयोगशालामा गरिएको परीक्षणले बिस्कुटमा बाह्य वस्तु मिसिएको पुष्टि गरेपछि उद्योगमाथि कडा कारबाही गरिएको हो ।
वाणिज्य, आपूर्ति तथा उपभोक्ता संरक्षण कार्यालय, विराटनगरका अनुसार उपभोक्ता संरक्षण ऐन, २०७५ अन्तर्गत कसुर प्रमाणित भएपछि जरिबाना तोकिएको हो । साथै, उद्योगलाई सुधार योजना पेश नगरेसम्म उत्पादन पुनः सञ्चालन नगर्न स्पष्ट निर्देशन दिइएको छ ।
ऐनको दफा ३८ अन्तर्गत कसुर प्रमाणित भएपछि दफा ३९ अनुसार २ लाख रुपैयाँ जरिबाना गर्ने निर्णय लिइएको हो । नियामक निकायले उद्योगलाई सात दिनभित्र जरिबाना बुझाएर त्यसको प्रमाण पेस गर्न निर्देशनसमेत दिएको छ ।
खाद्य प्रविधि तथा गुण नियन्त्रण विभागका अनुसार उपभोक्ताबाट प्राप्त उजुरीपछि गरिएको विस्तृत अनुगमनमा उद्योगको उत्पादन प्रक्रियामा गम्भीर कमजोरीहरू फेला परेका छन् ।
विशेषगरी, उत्पादन क्षेत्रमा सरसफाइ मापदण्ड पालना नभएको, कर्मचारीहरूले आवश्यक सुरक्षात्मक पोशाक (हेयर कभर, ग्लोभ्स) प्रयोग नगरेको तथा गुणस्तर परीक्षण प्रणाली कमजोर रहेको निष्कर्ष निकालिएको छ ।
Discussion about this post