इटहरी : काठमाडौंबाट विराटनगर उडान भरेको हेलिकोप्टर सुनसरीको इनरुवामा आपतकालीन अवतरण गरेको छ ।
अवतरणसँगै पाइलटसहित चारजनाको सकुशल उद्दार गरिएको छ । फिस्टेल एयरको हेलिकोप्टर शनिबार साँझ ६:४० बजे इनरुवा ६ स्थित सखुवागाछी नजिकै खेतमा आपतकालीन अवतरण गरिएको जिल्ला प्रहरी कार्यालय सुनसरीका एक प्रहरीले जानकारी दिए ।
उनका अनुसार विराटनगर विमानस्थलमा प्राविधिक कारणले हेलिकोप्टर अवतरण हुन नसेकपछि यहाँ अवतरण गरिएको हो । पाइलट, यात्रुसहित हेलिकोप्टरमा क्षति नभएको प्रहरीले जनाएको छ ।
‘विराटनगर विमानस्थलमा ५ बजेपछि इन्ट्रि गर्न दिने सिस्टम नभएका कारण सखुवागागाछीको खाली जमिनमा अवतरण गरिएको हो,’ ती प्रहरीले टाकुरासँग फोन सम्पर्कमा भने, ‘अहिले पुलिसले सुरक्षा दिइरहेको छ ।’
चालकदलका दुईसहित काठमाडौं भ्यू टावरका निर्माता समेत रहेका मनोज भेटवाल हेलिकोप्टरमा सवार रहेको प्रहरीले जनाएको छ ।
उनका अनुसार व्यक्तिगत रूपमा हायर गरेर मान्छे भेट्न आएको हेलिकोप्टर शनिबार (आज) साँझ अबेला मात्रै यहाँ आपतकालीन अवतरण गरेको हो ।
Discussion about this post