झापा : झापामा छुट्टाछुट्टै स्थानमा सवारी दुर्घटना हुँदा दुई जनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार मृत्यु हुनेमा एक महिला र एक पुरुष छन् । बिर्तामोडबाट गरामनीतिर जाँदै गरेको मे ५ प १३६५ नम्बरको मोटरसाइकल र विपरीत दिशाबाट आउँदै गरेको मे १ क ७८६ नम्बरको ट्रक ठोक्किएर दुर्घटना भएको हो ।
दुर्घटनामा मोटरसाइकल चालक झापाको बिर्तामोड नगरपालिका–९ का ४३ वर्षीय सम्पत राजवंशीको मृत्यु भएको छ । दुईवटा सवारी साधन ठोक्किएर गम्भीर घाइते भएपछि उपचारका लागि बि एन्ड सी अस्पताल पुर्याउनसाथ उनलाई चिकित्सकले मृत घोषित गरेका हुन् ।
दुर्घटनामा मोटरसाइकलको पछाडि सवार बिर्तामोड–९ की ३१ वर्षीया शान्ता कार्की घाइते भएकी छन् । मोटरसाइकलको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ ।
यस्तै, झापाको गौरादह नगरपालिका–७ ग्वालाडुब्बामा बा ८ च ७७३५ नम्बरको माइक्रोले ठक्कर दिँदा एक जनाको मृत्यु भएको छ ।
दुर्घटनामा गौरादह–७ की २८ वर्षीया सीता साहको मृत्यु भएको हो । दुर्घटनामा परेर गम्भीर घाइते भएकी उनको उपचारका क्रममा दमक अस्पतालमा बिहीबार दिउँसो ४ः२० बजेतिर मृत्यु भएको प्रहरीले जनाएको छ ।
माइक्रोको ठक्करबाट १९ वर्षीया सम्झना ऋषिदेव र अवदेश यादवकी ७ महिने नाबालिका छोरी आरोसी यादव घाइते भएका छन् । दुवै जनाको दमकमै उपचार भइरहेको छ ।
तीव्र गतिमा रहेको माइक्रोले घरअगाडि बसिरहेका बेला तीनै जनालाई ठक्कर दिएको प्रहरीले जनाएको छ ।
Discussion about this post