इटहरी : बालकको अपहरण गरेको आरोपमा सुनसरी प्रहरीले एक जनालाई पक्राउ गरेको छ ।
जिल्ला प्रहरी कार्यालय सुनसरीका प्रहरी उपरीक्षक (एसपी) सञ्जयसिंह थापाका अनुसार पक्राउ पर्नेमा इनरुवा नगरपालिका १० जाल्पापुर बस्ने इम्तियाज भनिने इन्जात मियाँ रहेका छन् ।
सुनसरीको हरिनगरा ६ बस्ने शिवचरण मेहताको छोरा १३ वर्षीय धीरजकुमार मेहतालाई गत शनिबार अपहरण गरेको आरोपमा उनलाई पक्राउ गरिएको हो ।
एसपी थापाका अनुसार अज्ञात मानिसले बलपूर्वक आफ्नो मोटरसाइकलमा चढाएर अपहरण गरी बालकलाई लगेको खबर प्रहरीमा प्राप्त भएको थियो ।
त्यसपछि खोजतलास र नियन्त्रणमा लिन एसपी थापाले प्रहरी चौकी भुटाहाको टोली परिचालन गरे ।
खोजी जारी राखेको प्रहरीले साँझ ७ बजेतिर इन्जातले भारतीय नम्बरको मोटरसाइकलमा बालकलाई चढाउन खोज्दै गरेको बेला हरिनगरा १ स्थित रामनगर–भुटाहा सडक खण्डमा फेला पारेको उनको भनाइ छ ।
तत्काल इन्जातलाई नियन्त्रणमा लिएर बालकको उद्धार गर्दै घटनाको अनुसन्धान सुरु गरिएको उनले बताए । प्रहरीको प्रारम्भिक अनुसन्धानबाट खेल्दै गरेको अवस्थामा बालकलाई इन्जातले को २६ प ४२२४ नम्बरको मोटरसाइकलमा जबरजस्ती लिएर गएको खुलेको छ ।
प्रहरीका अनुसार केही पर पुर्याएपछि मोटरसाइकलबाट फुत्किएर बालक भागेका थिए । थापाका अनुसार इन्जात पनि बिआर ३८ यु ३७९९ नम्बरको भारतीय मोटरसाइकलमा बालकको पिछा गरिरहेका थिए ।
त्यही बेला फेला पारेर इन्जातले पुनः मोटरसाइकलमा राखेर बालकलाई लैजान खोज्दै गर्दा प्रहरीले उनलाई पक्राउ गरेको हो ।
बालकलाई अपहरण गर्नुको कारण खुल्न सकेको छैन । पक्राउ परेका इन्जातविरुद्ध अपहरण तथा शरीर बन्धक सम्बन्धि मुद्दा चलाउन म्याद थप गरेर अनुसन्धान सुरु गरिएको सुनसरी प्रहरीले जनाएको छ ।
Discussion about this post