इटहरी : प्रदेश नं. १ मा कुनै दलको पनि बहुमत नपुगेपछि सरकार बनाउनै सकस हुने भएको छ ।
प्रदेशमा सबैभन्दा बढी सिट जितेर पहिलो पार्टी बनेको नेकपा एमाले एक्लैको बहुमत नपुगेपछि सरकार बनाउनै सकस भएको हो ।
सत्ता गठबन्धनले पनि बहुमत पु¥याउन नसकेपछि अब कसको नेतृत्वमा सरकार बन्छ भन्ने बहसको विषय बनेको छ । प्रत्यक्षमा १ सिट पनि नजितेको जनता समाजवादी पार्टी (जसपा) ले समानुपातिकमा १ सिट ल्याउँदा सो पार्टी नै सरकार निर्माणका लागि निर्णायक बन्नेछ ।
९३ सदस्यीय प्रदेशसभामा सरकार बनाउनका लागि ४७ सिट आवश्यक पर्छ । जसअनुसार प्रत्यक्षतर्फ २५ सिटमा जित हासिल गरेको एमालेले समानुपातिकमा १५ सिट पाएको छ । प्रत्यक्ष र समानुपातिक गरी एमालेको ४० सिट पुगेको छ ।
यस्तै, प्रत्यक्षतर्फ १७ सिट जितेको नेपाली कांग्रेसले समानुपातिकमा १२ सिट पाएको छ । कांग्रेसको कूल २९ सिट रहेको छ ।
यस्तै, प्रत्यक्षमा २ सिट जितेको राप्रपाले समानुपातिकमा ४ सिट पाउँदा कूल अरु ६ सिट प्राप्त गरेको छ । यस्तै, ९ स्थानमा जितेको माओवादी केन्द्रले समानुपातिकमा ४ सांसद पाउँदा कूल १३ सिट पाएको छ ।
यस्तै, प्रत्यक्षमा ३ सिट जितेको नेकपा एकीकृत समाजवादीले समानुपातिकमा १ सिट पाएको छ । जसअनुसार एसको कूल ४ सिट हुन्छ । पत्यक्षमा एउटा पनि सिट नजितेको जनता समाजवादी पार्टीले समानुपातिकतर्फ भने १ सिट प्राप्त गरेको छ ।
प्रदेश १ मा प्रत्यक्ष र समानुपातिकसहित नेकपा एमालेको ४०, नेपाली कांग्रेसको २९, माओवादी केन्द्रको १३, राप्रपाको ६, एकीकृत समाजवादी पार्टीको ४ र जसपाको १ सिट पुगेको छ ।
एमाले–राप्रपा र जसपा गठबन्धन गर्दै सरकारमा सहभागी भएमा एमालेको नेतृत्वमा सरकार बन्ने छ । सत्ता गठबन्धनबाट सरकार बनाउनका लागि १ सिट अभाव हुन्छ । प्रदेश १ मा सरकार बनाउनका लागि जसपा नै निर्णायक बन्ने भएको छ ।
अहिलेसम्म सरकारमा सहभागी हुने–नहुने भन्नेबारे जसपा मौन जस्तै छ ।
अब को मुख्यमन्त्री ?
यसैबीच अब प्रदेश १ को मुख्यमन्त्री को भन्नेबारे पनि छलफल सुरु हुन थालेको छ ।
नेपाली कांग्रेसबाट संसदीय दलको नेता हुँदै मुख्यमन्त्रीका दाबेदार रहेका गुरुराज घिमिरे र राजीव कोइराला पराजित भएपछि अब अमृत अर्यालको सम्भावना बढेको छ ।
नेपाली कांग्रेसका केन्द्रीय सदस्य समेत रहेका अर्याललाई मुख्यमन्त्री दिने शर्तमा प्रदेशमा टिकट दिइएको बताइन्छ । यस्तै, संसदीय दलको नेताका लागि भीम पराजुलीले पनि आकांक्षा राखेका छन् ।
संस्थापन पक्षका दुवै जनाको विकल्पमा कोइराला समूहबाट गुरुराज घिमिरे र राजीव कोइराला पराजित भएपछि केदार कार्कीको नाम अगाडि सारिएको छ । तर, उनीहरूबीच सहमति हुँदा अब अर्याल नै संसदीय दलको नेताका मुख्य आकांक्षी हुन् ।
यता, कांग्रेस प्रदेश १ का सभापति समेत रहेका उद्वव थापाले पनि मुख्यमन्त्रीको आकांक्षा राखेका छन् । उनी अहिले संसदीय दलको नेताका लागि तयारी थालेको स्रोत बताउँछ । उनी समानुपातिकबाट सांसद बनेका हुन् ।
नेकपा एमालेले भने हिक्मत कार्कीलाई मुख्यमन्त्रीमा अगाडि सार्नेगरी संसदीय दलको नेता बनाउने तयारी छ । यसअघि आन्तरिक मामिला तथा कानून मन्त्री भइसकेका कार्की ओलीको विश्वासपात्र मानिन्छन् ।
यस्तै, नेकपा माओबादी केन्द्रले भने आर्थिक मामिला तथा योजनामन्त्री समेत रहेका इन्दबहादुर्र आङ्बो (मौसम) मुख्यमन्त्री बन्ने तयारी गरिरहेका छन् । उनी दोस्रोपटक प्रदेशसभा सदस्यमा विजयी भएका हुन् ।
नेकपा एकीकृत समाजवादीले भने वर्तमान मुख्यमन्त्री राजेन्द्र राई पनि आँफू मुख्यमन्त्री हुने दौडमा छन् । तर, गठबन्धनको सरकार हुँदा उनको सम्भावना कम छ ।
Discussion about this post