इटहरी : यही माघ २८ गते हुने उद्योग वाणिज्य संघ इटहरीको निर्वाचनमा अध्यक्ष पदका लागि रञ्जु सिग्देल (चौलागाईँ) ले उम्मेदवारी दर्ता गराएसँगै अहिले घरदैलोमा व्यस्त रहेकी छन् ।
व्यापार व्यवसायमा सक्रिय उनी समग्र इटहरीको व्यवसायिक नेतृत्व लिने उत्साहका साथ चुनावी मैदानमा रहेकी छन् ।
श्रीमानले थालेको व्यवसायलाई सहयोग गर्दै कुशल व्यवसायीको छवि बनाएकी उनले सामाजिक कामलाई पनि अंगाल्दै आएकी छन् ।
‘व्यवसायमा आँफूले कमाउने भन्दा पनि समाजको लागि पनि योगदान गर्नुपर्छ भन्ने उदेश्यले आज चुनावी मैदानमा होमिएकी छु,’ सिग्देलले भनिन्, ‘संघर्षशील युवा तथा महिला व्यवसायीहरूको समस्या नजिकबाट नियालेकी छु, सोही कारण पनि समस्या समाधान गर्न मेरो भूमिका महत्वपूर्ण हुनेछ ।’
इटहरीस्थित सिग्मा सप्लायर्सकी सञ्चालिका उनले सानो लगानीमा इटहरीमा व्यवसाय सुरु गरेको स्मरण गरिन् ।
शिक्षा शास्त्रमा स्नातकोत्तरसम्म अध्ययन गरेकी उनले अध्ययन सकेसँगै व्यापारमा लागेकी हुन् । उवासंघको नेतृत्व गरेपछि आँफू जिम्मेवारीपूर्ण तरिकाले काम गर्ने उनी बताउँछिन् । ‘संघको अध्या भएँ भने म दुई वर्षको पुरै समय संघको व्यवस्थित विकासलाई दिनेछु,’
उनले भनिन्, ‘भोलि मैले संघको नेतृत्व अर्को समितिलाई सुम्पँदै गर्दा इटहरीको व्यवसायिक विकासको आधार बनिसकेको हुनेछ ।’
उद्योग वाणिज्य संघको सदस्य हुँदा गरेका काम
२०७३ सालमा भएको उद्योग वाणिज्य संघको निर्वाचनमा महिलातर्फ सदस्यमा निर्वाचित भइन् । उद्योग वाणिज्य संघको महिला सदस्य भूमिकाका हिसाबले निकै सानो ठाउँ हो । तर, उनले आफ्नो मिहिनेत र सीपलाई सक्दो उपयोग गरिन् ।
उनले महिला उद्यम समिति गठन गरेर महिला व्यवसायीहरूलाई समेटिन् र उनीहरूकै नेतृत्वमा महिला उद्यमी मेला लगाएर १४ वटा जिल्लाका महिलाहरूको प्रतिनिधित्व गराइन् ।
देशभरका विभिन्न कार्यक्रम, सभा, सम्मेलनमा इटहरीको प्रतिनिधित्व गराइन् । उद्यमीहरूका लागि विभिन्न किसिमका तालिमहरू आयोजना गरिन् । उनकै नेतृत्वमा इटहरीमा रोजगार मेला भयो ।
पराजयपछि पनि थाकिनन्
अर्को एक कार्यकालका लागि भएको संघको चुनाव भने उनले गणितीय रूपमा हारिन् । तर, उनी आफ्नो जिम्मेवारीबाट पछि हटिनन् । पदमा भएपनि नभएपनि उनी व्यवसायीहरुसँगै सहकार्य गरिरहिन् ।
नेपाल घरेलु तथा साना उद्योग महासंघ सुनसरीको महासचिव र नेपाल उद्यमशील महिला सुनसरीको महासचिवका रूपमा उनले जिल्लाभरीका साना उद्यमी उत्पादन गर्ने, तालिम दिने र उत्पादनको बजारीकरणका लागि सहयोग गर्ने काम गरिरहेकी छिन् ।
यस्ता छन् योजना
सरोकारवाला निकायहरूसँग समन्वय गरी इटहरीको औद्योगिक र व्यापारिक क्षेत्रको अवस्थामा सुधार ल्याउने उनको योजना छ । व्यवसायिक विकासमा राजनीतिक हस्तक्षेप र स्वार्थलाई सँगै जोड्न नहुने उनको तर्क छ ।
‘पार्किङ, घरबहाल, यहाँको ढल निकास, ट्राफिक व्यवस्थापन, कर र राजस्वका विषयमा देखिएका समस्याहरूलाई समन्वयात्मक वातावरणमा समाधान गर्न सकिन्छ,’ उनी भन्छिन्, ‘रणनीतिक योजना बनाएर कोशिस गर्यो भने असम्भव केही छैन, इटहरीको व्यवसायिक क्षेत्रको संस्थागत विकासको जग बसाउन धेरै काम गर्न सकिन्छ र म गर्छु ।’
उनले व्यवसायिक क्षेत्रमा अहिले देखिएका समस्या समाधान गर्न आफ्नो भूमिका महत्वपूर्ण हुने बताइन् ।
‘अहिले बैँकको ब्याजदर वृद्विका कारण व्यवसायीहरू मर्कामा छन्, ब्याजदर घटाउनका लागि दबाब दिने कुरामा अग्रसर रहनेछु,’ उनले भनिन्, ‘युवाहरूलाई रोजगारको अवसर सृजना गर्ने, व्यवसायिक डाटा निर्माण गर्ने, व्यवसायिक सुरक्षाका सवालमा मेरो उपस्थिति महत्वपूर्ण हुनेछ ।’
उनले औद्योगिक ग्राम स्थापनाका लागि पहल गर्ने र महिला उद्यमशीलता कार्यक्रमलाई प्राथमिकतामा राख्ने बताइन् । रोजगार मेला, प्रदर्शनी तथा विभिन्न व्यवसायिक तालिम सञ्चालनका निम्ति आँफ्नो योजना रहेको सिग्देल बताउँछिन् ।
साथै, इटहरीमा देखिएको पार्किङ समस्या समाधानका निम्ति व्यवस्थापन गर्न आफ्नो भूमिका रहने उनले बताइन् । उवासंघको भवनलाई सदुपयोग गरी आम्दानीको स्रोत बढाउने कुरामा पनि आँफू सकारात्मक रहेको उनको भनाइ छ ।
Discussion about this post