यही चैत ५ गते हुने स्वतन्त्र विद्यार्थी युनियन (स्ववियु) निर्वाचनमा इटहरीस्थित जनता बहुमुखी क्याम्पसमा नेपाल विद्यार्थी संघ (नेविसंघ) र समाजवादी विद्यार्थी युनियनबीच तालमेल भएको छ ।
नेविसंघले नेतृत्व गरेको तालमेलबाट सभापतिमा सहदेव काफ्ले उम्मेदवार छन् । कूल ५ हजार ७४३ विद्यार्थी रहेको यो क्याम्पसमा लामो समयदेखि विद्यार्थीको पक्षमा वकालगत गर्दै आएका काफ्लेसँग टाकुरा न्यूजले गरेको कुराकानीको सम्पादित अंश :–
१. स्ववियु निर्वाचन नजिकिदै छ, तयारी कस्तो छ ?
चुनावको समय नजिक आइसकेको छ । अहिले हामीले प्रत्येक विद्यार्थीकहाँ पुगेर मत माग्ने काम गरिरहेका छौँ । सँगै विद्यार्थीका समस्या र उनीहरूले भोग्नुपरेका दुःखबारे थप नजिकबाट नियाल्ने अवसर पाएका छौँ । विद्यार्थीका समस्या समाधानमा यसअघि हामी उनीहरूका साथमा उभिदैँ आएका छौँ । अब पनि विद्यार्थीकै समस्या समाधानमा निरन्तर डट्ने प्रतिबद्वतासहित चुनावी मैदानमा स्वच्छ प्रतिष्पर्धा गर्न आतुर छौँ ।
२. विद्यार्थीहरूमाझ जाँदा कस्तो प्रतिक्रिया पाउनुभएको छ ?
विद्यार्थीहरूबाट सहदेव काफ्ले नै अबको सभापति भन्ने प्रतिक्रिया सुन्दा खुशी छु । सँगै मलाई चुनौती पनि छ । मेरो नेतृत्वले विद्यार्थीको हितका निम्ति काम गर्ने कुरामा मलाई चुनौती छ । किनकि, क्याम्पसमा काम गर्न थुप्रै कुराहरू बाँकी छन् । तर, म कसैको दबाब, प्रभावमा नपरीकन, अलिकति पनि नडगमगाइकन निरन्तर विद्यार्थीका हितमा काम गर्दै आएको र आगामी दिनमा पनि सकारात्मक काम गर्ने प्रण रहेकाले विद्यार्थीहरूले मेरो कामको मूल्यांकन गर्नुहुनेछ भन्ने विश्वास छ । अहिलेसम्म विद्यार्थीबाट सकारात्मक प्रतिक्रिया पाएकाले उत्साहित छु ।
३. स्ववियुले तपाईंको नेतृत्व पायो भने थप के काम हुन्छ ?
स्ववियु भनेको सबै विद्यार्थीहरूको साझा थलो हो । भोलि स्ववियुमा नेतृत्व भयो भने को नेविसंघ, को अखिल, को राप्रविसंघ, को स्वतन्त्र भन्ने विभेद हुँदैन । सबैलाई समान रूपमा व्यवहार र काम गरिन्छ । स्ववियु सबै विद्यार्थीको साझा थलो हुनेछ ।
४. तपाईंका चुनावी एजेन्डा संक्षिप्तमा ?
हाम्रा मुख्य एजेन्डा हामीले ‘क्यू आर कोड’मार्फत सार्वजनिक गरेका छौँ । खासगरी, क्याम्पसमा व्यवस्थित र प्रविधिमैत्री क्याम्पस, ग्रीन कलेज, क्लिन कलेज, पेपरलेस क्याम्पस, मल्टिमिडिया प्रविधिबाट पठनपाठन, व्यवस्थित पार्किङ, उद्यमीसँग विद्यार्थी कार्यक्रम, खेलकुद पूर्वाधार निर्माण र संरचना स्तरोन्नती, थारु एवम् आदिवासी विद्यार्थीहरूलाई छात्रवृत्ति कार्यक्रम, करियर डेभलपमेन्ट प्रोग्राम, स्वास्थ्य बीमा कार्यक्रम, एक विद्यार्थी एक सेट पुस्तक, कला र साहित्यको प्रवद्र्वन जस्ता एजेन्डा उठाएका छौँ ।
यी एजेन्डाबाहेक थप एजेन्डा ‘क्यू आर कोड’मार्फत हेर्न र पढ्न सकिनेछ । हामी कामै गर्न नसक्ने र पूरा गर्न नसक्ने आश्वासन बाड्न चाहन्नौँ । हामीले उठाएका एजेन्डा काम गर्न सक्नेछन् ।
५. तपाईंलाई नै किन भोट हाल्ने ? विद्यार्थीले विश्वास गर्ने आधार ?
विगत लामो समयदेखि निस्वार्थ रूपमा विद्यार्थीका समस्या सँगै हातेमालो गरेर, सुख र दुःखमा साथ दिदैँ आएको छु । विद्यार्थीका प्रतिभा प्रस्फुटन गर्नेदेखि अन्य विभिन्न मुद्वाहरूमा, बस नपुगेका ठाउँमा समन्वय गर्ने, फि बढी भएका कक्षाहरूमा फि घटाउने लगायतका गतिविधिमा मैले नेतृत्व गरेको छु । यसकारण मलाई मत दिनुहुनेछ भन्ने अपेक्षा छ । र, मलाई मत दिनुहोस् भन्ने मेरो अपिल हो । मैले विगतमा गरेका गतिविधिकै कारण मेरो चुनाव जित्ने आधार हो ।
६. यसअघि अखिलले जित्यो, तर बीचमा स्ववियुको अनुभूति भएन भन्ने पनि सुनिन्छ । यो साँचो हो ?
यो भन्दा अघि अनेरास्ववियुले चुनाव जितेको हो । तर, स्ववियु भएको अनुभूति हुने त परको कुरा उहाँहरू चुनाव जितेर भाग्नुभयो । अनेरास्ववियुले चुनाव जितेर भागेको कुरा साँचो हो । हामीले त्यसबेला चुनाव हारेर पनि विद्यार्थीका हरेक समस्यामा साथ दिदैँ आएका छौँ ।
७. अन्त्यमा केही?
खासगरी भन्ने हो भने जनता क्याम्पसको हकमा हेर्दा विगतका दिनमा नेविसंघले अरु कुनै विद्यार्थी संगठनसँग होइन, पार्टीसँग चुनाव लड्दै आएको इतिहास छ । यस क्याम्पसमा हरेक समय नेविसंघ विद्यार्थीको समस्याको सारथी बनेर उभिदैँ आएको छ । हामीले यसअघिका निर्वाचनमा विद्यार्थीको मन जितेपनि मतसंख्यामा हाम्रो संख्या कम हुँदै आएको थियो ।
तर, यसपटक भने नेविसंघले हरेक गाउँमा, घरमा पुगेर विद्यार्थीसँग मत मागेको छ । र, क्याम्पसमा पर्ने हरेक समस्या समाधानमा हामीले विद्यार्थीको पक्षमा काम गर्दै आएकाले यसपटकको स्वतन्त्र विद्यार्थी युनियनको चुनाव हामीले जित्दैछौँ । र, हामीलाई यसपटक विद्यार्थीहरूले न्याय गर्नुहुनेछ भन्ने विश्वास छ ।
(यो अन्तर्वार्ता केहीदिनअघि नै रेकर्ड गरिएको र सम्पादन गर्न समय लागेकाले आज प्रकाशित गरिएको हो । -सं)
Discussion about this post