केन्द्रमा र अन्य विभिन्न प्रदेशमा सत्ता समीकरण फेरिएसँगै कोसी प्रदेशमा पनि सत्ता समीकरण फेरिने चर्चा हुँदैछ ।
एमाले नेतृत्वको प्रदेशसभामा हाल नेकपा माओबादी केन्द्र, राप्रपा, जसपा लगायतका दल सरकारमा सहभागी छन् । तर, केन्द्रको सत्ता समीकरण फेरिएसँगै यो प्रदेशमा पनि सत्ता समीकरण फेरिने चर्चा छ ।
यही चर्चाबीच कोसी प्रदेशमा अबको सत्ता समीकरण, कसको नेतृत्व र कस्तो मोडलको सरकार बन्छ भन्ने सन्दर्भमा केन्द्रित रहेर नेपाली कांग्रेस कोसी प्रदेश संसदीय दलका नेता उद्वव थापासँग टाकुरा न्यूजले गरेको कुराकानीको सम्पादित अंश :–
१. कोसी प्रदेशको सत्ता समीकरण फेरिने सम्भावना कति छ ?
सम्भावना छ । चाँडै नै सरकार परिवर्तन हुनसक्छ । हामीले आन्तरिक रूपमा गृहकार्य गरिरहेका छौँ । अब १० गतेको उपनिर्वाचनपछि केन्द्रिय नेताहरूसँग छलफल हुन्छ । १० गते पछाडि केन्द्रिय सरकारले पनि पूर्णता पाउँछ र प्रदेशको सत्ता फेरिने विषयमा पनि छलफल हुन्छ ।
२. अब सत्ता फेरिए मुख्यमन्त्री को ?
मुख्यमन्त्री को बन्छ भन्ने कुरा भन्दापनि आलोपालोको सरकार बन्छ । गठबन्धनको सरकार रहन्छ । केन्द्रिय तहमा आलोपालो बनाएअनुसार नै प्रदेशमा पनि आलोपालोको सरकार बन्छ । अबको मुख्यमन्त्री को भन्ने कुरा चैँ शीर्ष नेताको हातमा छ । सबै दलले आफ्नै दलको नेतृत्व हुनुपर्छ भनिरहेका छन् । माओबादी, समाजवादी जस्ता दलले मुख्यमन्त्री मागिरहेका छन् ।
- यहाँ साथीहरूले कसलाई मान्ने, नमान्ने भन्दापनि केन्द्रिय नेतृत्वको निर्णय मान्ने हो । केन्द्रिय नेतृत्वले संसदीय दलको नेताबाहेक अरुलाई मुख्यमन्त्री दिने भन्ने नै हुँदैन ।
हामीले बसेर प्रदेशको निर्णय गर्न सक्दैनौँ । गरेपनि कार्यान्वयन हुन सक्दैन । त्यसैले हामीले यहाँ कसलाई समर्थन गर्ने, नगर्ने भन्दा पनि केन्द्रबाट सबै टुंगिन्छ । केन्द्रिय नेताहरू बसेर टुंग्याउनुहुन्छ ।
३. कतिपयपले त मुख्यमन्त्रीमा नेपाली कांग्रेसबाट संसदीय दलको नेता हो भन्ने मान्य नहुने भन्ने चर्चा पनि छ नि ?
ठिक प्रश्न उठाउनुभयो । संसदीय दलको नेतालाई मुख्यमन्त्री नमान्ने भन्ने कुरा हुनु अस्वभाविक हो । खासगरी राप्रपा र कांग्रेसभित्रकै केही साथीहरूले यस विषयमा कुरा गरेको मैले पनि यदाकदा सुनेको छु ।
यहाँ साथीहरूले कसलाई मान्ने, नमान्ने भन्दापनि केन्द्रिय नेतृत्वको निर्णय मान्ने हो । केन्द्रिय नेतृत्वले संसदीय दलको नेताबाहेक अरुलाई मुख्यमन्त्री दिने भन्ने नै हुँदैन ।
४. कांग्रेसभित्रकै कुरा पनि उठाउनुभयो । कांग्रेसबाट तपाईँबाहेक अरुलाई मुख्यमन्त्रीमा अगाडि सार्ने हो ?
दुईवटा कुरा छ । पहिला त माननीय भइसकेर जिम्मेवार पदमा रहेका साथीहरूले दलको विधान हेर्नुपर्छ । कांग्रेसको विधानले दलको नेताबाहेक अरुलाई नेतृत्वमा पठाउन मिल्दैन । सल्लाह र सहमतिबाट विधान परिवर्तन पनि हुँदैन ।
- कांग्रेसबाट म बाहेक अरु मुख्यमन्त्री बन्ने कुरा दिवासप्ना मात्रै हुन्छ । म दलको नेता हुँदाहुँदै अरु मुख्यमन्त्री बन्ने कुरा हुनै सक्दैन ।
जो मुख्यमन्त्री बन्न चाहनुभएको छ, वहाँहरूले संसदीय दलको नेता नबाहिरिकन मुख्यमन्त्री बन्न सक्दैन । कांग्रेसमा संसदीय दलको नेताबाहेक अरु नै मुख्यमन्त्री बन्ने कुरा बाहिर चर्चामा छ । कतिपय साथीहरूले तपाईँ दलको नेता हुँदा हुँदै अरुलाई मुख्यमन्त्री बनाउने भनेर प्रश्न पनि गरिरहनुभएको छ ।
कांग्रेसबाट म बाहेक अरु मुख्यमन्त्री बन्ने कुरा दिवासप्ना मात्रै हुन्छ । म दलको नेता हुँदाहुँदै अरु मुख्यमन्त्री बन्ने कुरा हुनै सक्दैन । अर्को कुरा पनि छ । कतिपय प्रदेशमा दलको नेता मन्त्री बनेका कुरा पनि छन् ।
कोसी प्रदेशमा म यदि मुख्यमन्त्री नभएको अवस्थामा मन्त्री बन्दिन । साथीहरूलाई मन्त्री बनाएर पठाउँछु । पालो आउँदा मुख्यमन्त्री नै बन्छु ।
५. कांग्रेसभित्रैबाट तपाईँलाई असहयोग भएको अवस्थामा अरु दललाई नै मुख्यमन्त्री दिने हो ?
मैले अघि पनि भनिसकेँ । हामीले भन्दा पनि हामी केन्द्रिय नेतृत्वको निर्णयको पर्खाइमा छौँ । माथिका नेतालाई तलको कुराले प्रभाव पार्दैन । अब शीर्ष नेतृत्वको बैठकले को मुख्यमन्त्री बन्ने भन्ने विषयमा टुंगो लगाउँछ ।
Discussion about this post