इटहरी : एभरेष्ट बैंक इटहरीबाटै निक्षेपकर्ता सर्वसाधारणको रकम चोर्ने मुख्य योजनाकार एभरेष्ट बैंक उदयपुरका शाखाका अपरेशन मेनेजर नीरज प्रधान रहेको प्रहरी अनुसन्धानबाट खुलेको छ ।
एभरेष्ट बैंक इटहरी शाखाबाट ३३ जना निक्षेपकर्ताको एक करोड ५० लाख २३ हजार ४३४ रुपैयाँ गायब भएको उजुरी प्रहरीसमक्ष पुगेको थियो । त्यही उजुरीको आधारमा प्रहरीले २०७९ चैत १२ गते मेनेजर प्रधानलाई नियन्त्रणमा लिएको थियो । त्यसपछि घटनामा संगठित गिरोह नै लागेको खुलेको थियो ।
प्रहरीका अनुसार हालसम्म धनुषाका शंकर भुजेलको व्यक्तिगत खातामा ८ लाख र अजय खिउजूको खातामा ११ लाख पुगेको देखिएको छ । सुनसरी प्रहरीका निमित्त प्रमुख डीएसपी राजकुमार राईका अनुसार जुवाको लतमा लागेका प्रधान हार्न थालेपछि बैंक ठगीमा लागेका हुन् । उनी विदेशी एपमा जोडिएर जुवा खेल्ने, सट्टेबाजी गर्ने गर्दथे ।
‘कमाएको पैसाले जुवा खेल्न अपुग भएपछि उनी बैंक ठगीमा लागेको देखिएको छ,’ डिएसपी राईले भने, ‘बैंकको अपचलन गरेको रकम अनलाइन जुवा, सट्टेबाजी खेल र मोजमस्तीमा उडाएको बयानको क्रममा बताएका छन् । कति रकम जुवामा सके त्यो खुलीसकेको छैन । अहिले अनुसन्धान भइरहेको छ ।’
पक्राउ परेका कुन कर्मचारीले कति बैंकको अपचलन गरे त्यो पनि खुलिसकेको छैन । बयान अझै जारी रहेको राईले बताए । ‘पक्राउ परेका प्रधानसहित सबैको बयान लिने क्रम चलिरहेको छ,’ उनले भने, ‘अनुसन्धानपछि कुन कर्मचारीले कति रकम अपचलन गरे त्यो पनि खुलाउनेछौं ।’
प्रहरीले प्रधानले जुवा खेल्ने एपको विषयमा पनि अनुसन्धान गरेको थियो । तर, उक्त एप विदेशबाट संचालन हुने भएकोले जुवाजन्य खेलमा को कहाँ जोडिए भन्ने खुल्न नसकेको राईले बताए ।
प्रहरीले प्रधानसहित बैंकको इटहरी शाखा प्रबन्धक सिन्धुपाल्चोक बाह्रविसे ८ घर भएका ४२ वर्षीय विश्वराज शाक्यसहित नौ जनाको मिलेमतो रहेको जनाएको छ ।
बैंक ठगी प्रकरणमा हालसम्म पक्राउ पर्नेमा एभरेष्ट बैंक इटहरी शाखाका सुपरभाईजर धावा लामा, बैंकका कनिष्ठ सहायकहरु मनोज घिमिरे, देवराज शर्मा, रंजित पण्डित, बैंकको इटहरी शाखाकी टेलर पवित्रा कटुवाल रहेका छन् ।
त्यस्तै, धनुषाको मिथिला नगरपालिका ११ का शंकर भुजेल, भक्तपुरको सुर्यविनायक नगरपालिका २ का अजय खिउजू पनि पक्राउ परिसकेका छन् । प्रहरीले गत शुक्रबार उनीहरुलाई पक्राउ गरेको हो ।
पाँच महिनाको अवधिमा ३३ जना ग्राहकको खाताबाट ५९ पटक कनेक्ट आईपीएस र नक्कली चेकबुक प्रयोग गरेर १ करोड ५० लाख २३ हजार ४३४ रुपैयाँ चोरी भएको अनुसन्धानबाट खुलेको डीएसपी राईले बताए ।
ग्राहकको कनेक्ट आईपीएसको आइडी पासवर्ड चोरी गरी र नक्कली चेक बनाएर रकम झिक्ने गिरोहका नाइके प्रधान इटहरीबाट पछि गाइघाट शाखाका अपरेशन इञ्चार्ज भएर गएका थिए । उनी उदयपुर गएपछि पनि इटहरी शाखाबाट रकम अपचलन भएपछि थप कर्मचारी पक्राउ परेको प्रहरीले जनाएको छ ।
इटहरी शाखामा कार्यरत प्रधानको गत मार्च १२ तारिकमा गाइघाट सरुवा भएको थियो ।
उनको योजनामा गत १४ नोभेम्बर २०२२ देखि ३१ मार्च २०२३ सम्म पाँच महिनाको अवधिमा ५९ पटक कनेक्ट आईपीएसबाट एक करोड १४ लाख ७५ हजार २८४ रुपैयाँ निकालिएको छ । त्यस्तै, नक्कली चेकमार्फत ३५ लाख ४८ हजार १५० रुपैयाँ निकालिएको प्रहरीले बताएको छ ।
रातोपाटीको सहयोगमा ।
Discussion about this post