चारजना सवार मोटरसाइकल दुर्घटना अपडेट : पाँच महिने छोरा च्यापेर सहयोगको चीत्कार

इटहरी : मध्यदिउँसो मधूरो घाम लागिरहेको, तर गर्मी चर्को छ । घरको आँगनमा पाँच महिने छोरा च्यापेर छटपटिरहेकी छन्, साजनकुमारी चौधरी ।

साउन ५ गते राति १०ः४० बजेतिर इटहरी १७ कान्छीचौकमा चारजना सवार मोटरसाइकल दुर्घटना भयो ।

दुर्घटनामा तीनजनाको मृत्यु भएको छ भने एकजना गम्भीर घाइते छन् । गम्भीर घाइते इटहरी १६ का २७ वर्षीय प्रेम चौधरीकी श्रीमती हुन्, साजनकुमारी । प्रेमको अहिले विराटनगरस्थित गोल्डेन अस्पतालमा उपचार भइरहेको छ ।

अचेत अवस्थामा रहेको प्रेमको अझै होस आएको छैन । डाक्टरले बचाउने आश्वासन दिएका छन् । तर, अस्पतालमा उपचारका लागि आवश्यक पर्ने आर्थिक अवस्था दयनीय हुँदा साजनकुमारी अहिले आर्थिक सहयोगको चीत्कार गरिरहेकी छन् ।

उनी आफ्ना श्रीमानको उपचारका लागि सहयोग जुटाउन एकातिर चीत्कार गरिरहेकी छन् भने अर्कोतर्फ आफ्ना नाबालक छोराछोरीको हेरचाहमा पनि उत्तिकै समय खटिरहेकी छन् । सँगै, घरायसी काममा पनि व्यस्त छिन् ।

‘खर्च अभावका कारण र अस्पतालले भनेजति पैसा जुटाउन नसक्दा उपचारमै समस्या हुने हो कि भन्ने पीर छ,’ मलीन चेहरामा साजनकुमारीले टाकुरासँग भनिन्, ‘सकेसम्म चाँडै धेरै पैसा जुटाउन पाए बचाउन सकिन्थ्यो कि ?’

उनले १० वर्षअघि प्रेमसँग प्रेमविवाह गरेकी हुन् । दिनभर मजदुरी (ज्यालादारी) काम गरेर जीवीकोपार्जन गर्दै आएका उनको परिवारसँग अहिले कमाउने मान्छे नै अचेत अवस्थामा रहेपछि अवस्था थप असहज बन्दै गएको छ ।

‘छोरी पाँच कक्षामा पढ्दै छ, छोरा भर्खरै पाँच महिनाको मात्रै भयो । घरायसी कामसँगै छोराछोरीको हेरचाह गर्दै दिन बित्छ,’ उनले भनिन्, ‘कमाउने मान्छे नै दुर्घटनामा परेर हस्पिटलमा हुँदा बिचल्ली भएको छ ।’

खर्च अभाव भएकाले अहिले केही रकम भने जुटिरहेको उनले बताइन् । इटहरी उपमहानगरका मेयर हेमकर्ण पौडेलले उपचारका लागि पचास हजार सहयोग गर्ने आश्वासन दिएका छन् । त्यससँगै स्थानीयहरूले पनि सहयोग जुटाइरहेका छन् ।

एकै गाउँका तीनजनाको निधन हुँदा गाउँ नै शोकाकूल बनेको छ । गम्भीर घाइते बनेका प्रेमलाई भने खर्च भएमा बचाउन सक्ने आशा छ ।

प्रेमका आफन्त मिलन चौधरीले उनीहरूको आर्थिक अवस्था दयनीय रहेकाले स्थानीय सरकार, सहयोगी दाता र विभिन्न निकाय गुहारेको बताए ।

‘ज्याला मजदुरी गरेर खाने मान्छे अहिले अस्पतालमा हुँदा निकै समस्या छ,’ मिलनले भने, ‘उपचारका लागि अनुमानित २५ लाखभन्दा बढी लागत लाग्ने अनुमान गरिएको छ ।’ उनले अहिले आँफूहरूले सहयोगका लागि दातालाई गुहारेको बताए ।

परिवारजनका अनुसार प्रेम साउन ५ गते स्थानीय कपिल चौधरीको ससुराली घर सुनसरीको मधेशा गएका थिए । प्रेमसँगै स्थानीय २६ वर्षीय करण चौधरी कपिलको ससुराली घर पाहुना गएका थिए ।

तर, राति ८ बजेतिर घर फर्कने क्रममा बीच बाटोमा आएपछि मोटरसाइकल बिग्रिएको र गाउँकै साथीहरू २७ वर्षीय शम्भु चौधरी र २४ वर्षीय अनिनेश चौधरीलाई लिन बोलाए ।

दुईजना मान्छे भएका कारण दुईवटा मोटरसाइकलमा आउने विश्वासले बोलाएपनि शम्भु र अनिनेश एकै मोटरसाइकलमा गए । मोटरसाइकल स्थानीयकहाँ राखेर चारैजना एकै मोटरसाइकलमा आउने क्रममा पिकअपसँग ठक्कर भई दुर्घटना भएको परिवारको दाबी छ ।

पूर्वबाट पश्चिमतर्फ जाँदैै गरेको भारतीय नम्बर डब्लु बी ७३ इ ९११७ को पिकअपसँग पश्चिमबाट पूर्व आउँदै गरेको को २९ प ३७१२ नम्बरको मोटरसाइकल एकापसमा ठक्कर भएको थियो ।

हालसम्म मोटरसाइकल चालक को हो भन्ने पत्ता नलागेको जिल्ला प्रहरी कार्यालय सुनसरीले जनाएको छ । प्रहरीले भने ट्राफिक जाँचमा रहेका प्रहरीलाई छलेर भाग्ने क्रममा तीव्र गति हुँदा पिकअपसँग ठोक्किएको जनाएको छ ।

दुर्घटनामा करण, शम्भु र अनिनेशको मृत्यु भएको थियो । उनीहरूको साउन ६ गते इटहरीस्थित बूढीगंगा जमुना मुक्तिघाटमा सामूहिक अन्त्यष्टि गरिएको छ ।

दुर्घटनामा सवार पिकअप चालक भारत दार्जीलिङ फोडिगढी बस्ने ३२ वर्षीय गोविन्द वरमुनलाई इलका प्रहरी कार्यालय पकलीले नियन्त्रणमा लिएर थप अनुसन्धान गरिरहेको छ ।

दुर्घटनामा गम्भीर रहेका प्रेमलाई बचाउन आर्थिक सहयोग आवश्यक पर्ने भएकाले अहिले परिवारजनले सहयोगको चीत्कार गरेका छन् ।

साजनकुमारीको इटहरीस्थित प्रभु बैँकको २६७७०६६१५०८०००१८ खाता नम्बरमा सहयोगको समेत अपिल गरिएको छ । साथै, उनको मोबाइल नम्बर ९८२७३७३३०३ मा पनि सम्पर्क गर्न सकिने बताइएको छ ।