झापा : बाढी पहिरो, चट्याङ, आगलागी, जंगली जनवार, हावाहुरी जस्ता विपदका कारण कोसी प्रदेशमा एक वर्षभित्र ५७ जनाले ज्यान गुमाएका छन् भने अरबौं रुपैयाँको क्षति भएको छ ।
आर्थिक वर्ष २०७९।०८० मा कोसी प्रदेशका १४ जिल्लामा बिपदजन्य घटनाका कारण ५७ जनाले ज्यान गुमाएको कोसी प्रदेश प्रहरी कार्यालयका प्रहरी नायव महानिरीक्षक राजेशनाथ वास्तोलाले बताए ।
विपद्जन्य घटनाका कारण अघिल्लो आर्थिक वर्ष २०७८।०७९ मा ३४ जनाले ज्यान गुमाएका थिए । तर, आर्थिक वर्ष २०७९।०८० मा यो संख्या बढेर ५७ पुगेको हो ।
प्रदेश प्रहरी कार्यालयका अनुसार बाढी पहिरोका कारण कोसी प्रदेशमा २३ जनाले ज्यान गुमाएका छन् । अघिल्लो आर्थिक वर्ष यो अवधिमा ५ जनाले ज्यान गुमाएका थिए ।
यता चट्याङ्गका कारण आर्थिक वर्ष २०७९।०८० मा ९ जनाले ज्यान गुमाएका छन् । अघिल्लो आर्थिक वर्ष ६ जनाले ज्यान गुमाएका थिए । आगलागीका कारण आर्थिक वर्ष २०७८।०७९ वर्ष र आर्थिक वर्ष २०७९।०८० भित्र ज्यान गुमाउनेको संख्या ३० रहेको छ । आर्थिक वर्ष २०७८।०७९ र आर्थिक वर्ष २०७९ र०८० मा १५–१५ जनाले ज्यान गुमाएका हुन् ।
हावाहुरीका कारण पछिल्लो दुई वर्षमा कसैले पनि ज्यान नगुमाएता पनि आर्थिक वर्ष २०७७।०७८ मा एक जनाले ज्यान गुमाएको प्रहरीको तथ्याङ्कमा उल्लेख छ ।
विपद्जन्य घटनामा परी प्रदेशमा रहेक वर्ष अर्बभन्दा बढी रुपैयाँको क्षति हुने गरेको पाइएको छ । आर्थिक वर्ष २०७९ र०८० मा मात्रै बाढी पहिरोका कारण पाँच अर्ब ३४ करोड, ७१ लाख, २५ हजार ४ सय रुपैयाँ बराबरको क्षति भएको हो ।
अघिल्लो आर्थिक वर्ष सो अवधिमा एक अर्ब ८० करोड ६५ लाख ६४ हजार १ सय ७० रुपैयाँ बरावरको क्षति भएको थियो । तर, आर्थिक वर्ष २०७९।०८० मा बाढीजन्य विपद्का कारण झण्डै पाँच गुणा बढी धनमालको क्षति भएको कोसी प्रदेश प्रहरी कार्यालय विराटनगरले जनाएको छ ।
Discussion about this post