इटहरी : लामो समयदेखि निष्क्रिय रहेका सुनसरी र मोरङका सात वटा सहकारी संस्थाको दर्ता खारेज गरेको छ।
उद्योग, कृषि तथा सहकारी मन्त्रालयअन्तर्गत प्रदेश सहकारी रजिस्ट्रार तथा प्रशिक्षण कार्यालय, इनरुवाले बिहीबार सूचना प्रकाशित गर्दै प्रदेश सहकारी ऐन, २०७६ को दफा ७३ को उपदफा (३) बमोजिम ती संस्थाको दर्ता खारेज गरिएको जनाएको हो।
कार्यालयका अनुसार नियमन क्षेत्राधिकारभित्र रहेका ती सहकारी संस्थाले विगत दुई वर्षदेखि नियमित विवरण नबुझाई निष्क्रिय रहेका थिए।
कार्यालयले २०८२ भदौ २ गते ३५ दिने र २०८२ पुस २ गते २१ दिने सूचना जारी गर्दै संस्था अद्यावधिक हुन आह्वान गरेको थियो। त्यसपछि स्थलगत अनुगमन र आवश्यक कानुनी प्रक्रिया पूरा गरी २०८३ असार ३२ गतेको निर्णयअनुसार दर्ता खारेज गरिएको कार्यालयले जनाएको छ।
कार्यालयका अनुसार दर्ता खारेज भएसँगै ती संस्थाको दर्ता प्रमाणपत्र स्वतः रद्द भएको छ। यसरी खारेज गरिएका सहकारी संस्थामा कोशेली बचत तथा ऋण सहकारी संस्था लि., बेलबारी–११, मोरङ, नवजागरण बहुउद्देश्यीय सहकारी संस्था लि., साविक मृगौलिया–५, मोरङ, नीलकण्ठ कृषि सहकारी संस्था लि., दुहबी–२, सुनसरी, आरोग्य स्वास्थ्य सेवा (अस्पताल) सहकारी संस्था लि., दुहबी–४, सुनसरी रहेका छन्।
यसैगरी जब्दी महिला कृषक बचत तथा ऋण सहकारी संस्था लि., इटहरी–१९, सुनसरी, आदर्श कृषि सहकारी संस्था लि., इटहरी–१६, सुनसरी र तीनकुने महिला बचत तथा ऋण सहकारी संस्था लि., रामधुनी–८, सुनसरी रहेका छन्।
प्रदेश सहकारी रजिस्ट्रार कार्यालयले कानुनी दायित्व पूरा नगर्ने तथा लामो समयसम्म निष्क्रिय रहने सहकारी संस्थामाथि आवश्यक कारबाहीलाई निरन्तरता दिइने जनाएको छ।
Discussion about this post