मोरङकी थापासहितलाई अपहरण गरी फिरौती लिने चारजना पक्राउ

इटहरी (डेस्क) : वैदेशिक रोजगारीका लागि ग्रिस पुगेका एक नेपालीलाई अपहरण गरी फिरौती उठाउने चार जनालाई प्रहरीले पक्राउ गरेको छ।

पक्राउ पर्नेमा धनकुटाका ३२ वर्षीय शिवराज कुँवर, काठमाडौँका ५६ वर्षीय रामेश्वर अर्याल, कपिलवस्तुका ३२ वर्षीय प्रकाश बेलवासे र पर्वतका ४२ वर्षीय दिलबहादुर थापा रहेका छन्।

नेपाल प्रहरीको केन्द्रीय अनुसन्धान ब्यूरो (सीआईबी)ले काठमाडौँको गौरीघाटबाट फिरौतीको २१ लाख ७५ हजार रुपैयाँसहित पक्राउ गरेको जनाएको छ ।

प्रहरीका अनुसार गत जेठ १२ गते मोरङको रंगेली नगरपालिका २ बस्ने २५ वर्षीया साबित्रा थापा, उदयपुर जिल्लाको त्रियुगा नगरपालिका ३ बस्ने कृष्ण कार्की र काभ्रेपलाञ्चोक नमोबुद्ध १ मथुरापाटी बस्ने ३० वर्षीय राजन सत्याल एकसाथ नेपालबाट सिजनल भिसामा वैदेशिक रोजगारको सिलसिलामा सर्बिया गएका थिए।

सर्बियामा चित्तबुझ्दो रोजगार तथा तलव सुविधा नपाएको कारण लुकीछिपी ग्रीस प्रवेश गरे। त्यसक्रममा हिन्दी भाषा बोल्ने अपरिचित पाकिस्तानी भन्ने खुल्न आएका व्यक्ति तथा उसको सहयोगी समेतले उनीहरूलाई अपहरण गरी, डोरीले बाँधेर शारीरिक तथा मानसिक यातना तथा डर त्रास देखाइ, ज्यान मार्ने धम्की दिएर पीडितको नेपालमा रहेका परिवारहरूसँग १५ हजार युरो फिरौती मागे।

ग्रिस तथा दुबईबाट ह्वाट्सएपमार्फत पीडितका परिवारहरूलाई सम्पर्क गरी २१ लाख ७५ हजार रुपैयाँ नेपालमा फिरौती रकम लिएको प्रहरीले जनाएको छ।

ग्रिसमा बन्धक भएका चारै जनालाघ पनि प्रहरीले सकुशल नेपाल फिर्ता ल्याएको छ। पक्राउ परेकामध्ये शिवराज कुँवरको भूमिका नेपालमा फिरौती रकम लिने रहेको थियो।

पक्राउ परेका व्यक्तिहरूलाई अपहरण तथा शरीर बन्धक मुद्दामा म्याद लिई थप अनुसन्धान भइरहेको सीआईबीले जनाएको छ।