इटहरी : शुक्रबार उदयपुरको बेलका नगरपालिकामा पर्ने सप्तकोसी किनारमा सशस्त्र प्रहरी बल नेपाल १ नं. बराह बाहिनीले गोताखोर तालिमको समापन गर्ने कार्यक्रम थियो ।
कार्यक्रम सुरु भएसँगै बाढीमा बगाएको दृश्य देखाउन सुरु गरियो । कार्यक्रमका प्रमुख अतिथिसहित अन्य आमन्त्रितहरू डेमो हेर्न केन्द्रित भए ।
त्यसैबेला ठूलो आवाजसहित नदीमा डुंगा पल्टिएको आवाजसहित कोलाहल भयो । आमन्त्रित मानिसहरू उक्त आवाज र दृश्य पनि डेमो नै भन्ने बुझे । तर, उक्त दृश्य डेमो नभएर सत्य सावित भयो ।
सुनसरीतर्फबाट कार्यक्रमस्थल आउँदै गरेका पत्रकारसहित सशस्त्र प्रहरी चढेको डुंगा नदीमा पल्टियो । तर, डुंगा पल्टिएको केहीबेरमै सशस्त्रको गोताखोर टोलीले सकुशल उद्धार गरेको छ । केही घाइतेहरूलाई भने सशस्त्रले तत्काल उद्धार गरी धरानस्थित वीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
सशस्त्र प्रहरी १ नं. बराह बाहिनीले २० जना सशस्त्र प्रहरीलाई गोताखोर तालिममा सहभागी गराएको थियो । कोशी प्रदेशको आन्तरिक मामिला तथा कानुन मन्त्रालयको सहकार्यमा सम्पन्न तालिमको शुक्रबार उदयपुरको बेलका नगरपालिका क्षेत्रमा पर्ने सप्तकोसी किनारमा डेमो प्रस्तुत गर्दै गोताखोर तालिमको समापन गरिएको हो ।
कार्यक्रमका प्रमुख अतिथि कोशी प्रदेशका मुख्यमन्त्री केदार कार्कीले प्रदेश सरकार विपद्को बेला सारथी भएर उभिने तर्क गरे । उनले भने, ‘नदीलाई सदुपयोग गर्दा यसबाट लाभ लिन सकिन्छ, सही सदुपयोग गर्दा नदी जीवन हो । तर, दुरुपयोग गर्दा नदीले ज्यान पनि लिन्छ ।’
खासगरी विपद्को बेला समाजसेवी धारीले पीडित परिवार र बस्तीमा पुगेर चाउचाउ बाड्ने र फोटो खिचाउने प्रचलन रहेकाले त्यसलाई चिर्नका निम्ति प्रदेश सरकार प्रतिबद्ध रहेको उनले बताए । बाढी, पहिरो लगायतबाट ज्यान जान नदिनका लागि विभिन्न निकाय र जिल्लामा रहेका विपद् व्यवस्थापनसँग सहकार्य गरी काम गर्ने उनले बताए ।
‘विपद् हुनसक्ने ठाउँको नक्साकंन गरियोभने पूर्व तयारी गर्न सकिन्छ,’ उनले भने ।
सशस्त्र प्रहरी नायब महानिरीक्षक अञ्जनी कुमार पोखरेलकाअनुसार गत भदौदेखि तालिम सञ्चालन भएको थियो । कूल ३६ दिन भएको तालिममा सहभागीहरुले अब नदीको ७० फिट गहिराईसम्म पुगेर उद्धार गर्न सक्नेछन् । सप्तकोसीको विभिन्न भाग र पोखराको फेवातालमा तालिम सञ्चालन भएको थियो ।
देशभर हुनसक्ने विपद्का घटनामा प्रभावकारी परिचालन गर्ने उदेश्यले जनशक्ति थप गर्नका लागि नेपालमा पहिलोपटक सशस्त्र प्रहरी बल नेपाल १ नं. बराह बाहिनी पकलीले गोताखोर तालिमको अभ्यास गरेको उनले बताए ।
गोताखोर अभ्यास प्रभावकारी भएको उनको भनाइ छ । गोताखोरले अक्सिजनयुक्त विशिष्ट उपकरणसहित स्थिर तथा निश्चित बहावयुक्त पानीभित्र स्थानअनुसार १८० फिट गहिराईसम्म लगातार एक घण्टा खोज तथा उद्धार गर्न सक्ने उनले बताए ।
कार्यक्रममा धरान उपमहानगरपालिकाका मेयर हर्कराज राईले कोसीलाई अवसरको रुपमा लिनुपर्ने बताए ।
‘यो बगिरहेको पानी नभएर पैसा हो, यो पैसालाई हामीले प्रयोग गर्न सक्नुपर्छ,’ उनले धरानमा खानेपानीको अभाव रहेको संकेत गर्र्दै भने, ‘यहाँ पानी बगिरहेको छ, माथितिर खडेरी भइरहेको छ । खडेरीलाई हरियाली बनाउन पनि सप्तकोसीको पानी त्यतातिर पुग्नुपर्छ ।’
कार्यक्रममा गोताखोर तालिममा सहभागीहरूलाई प्रमाणपत्रसमेत वितरण गरिएको थियो ।
कार्यक्रममा बेलका नगरपालिकाका मेयर अशोक कार्की, प्रदेश सरकारका सचिव डा. दीपक काफ्ले लगायतले बोल्दै विपद्को समयमा सबै निकायसँग सहकार्य गरी काम गर्ने बताए ।
Discussion about this post