इटहरी : लायन्स क्लब अफ इटहरी सुपर समृद्विद्वारा आयोजना गरिएको निःशुल्क आँखा, सुगर र प्रेसर जाँचमा पाँच सय जनाभन्दा बढी लाभान्वित भएका छन् ।
लायन्स क्लब अफ इटहरी सुपर समृद्वि र फुजिसान सगरमाथा बोर्डिङ स्कुलको संयुक्त आयोजनामा भएको शिविरमा नवदृष्टि आँखा हस्पिटलको सहकार्य रेहको थियो ।
शुक्रबार इटहरी १९ स्थित फुजिसान सगरमाथा स्कुलको प्राङ्गणमा आयोजना भएको शिविरमा पाँच सय भन्दा बढी लाभान्वित भएको लायन्स क्लबका अफ इटहरी सुपर समृद्विका अध्यक्ष राकेश श्रेष्ठले बताए ।
जहाँ आवश्यकता, त्यहाँ लायन्स भन्ने उदेश्यले उक्त कार्यक्रमको आयोजना गरेको उनको भनाइ छ । उनकाअनुसार शिविरमा दुई सय वटा चस्मा निःशुल्क प्रदान गरियो ।
मोतियाविन्दु लागेका १७ जनाको निःशुल्क अप्रेसनसमेत गरिने उनले बताए । त्यसबाहेक विपन्न वर्गका नागरिकलाई ४० हजार बराबरको उपचार खर्च लायन्स र फुजिसान स्कुलले व्यहोर्ने श्रेष्ठले जानकारी दिए ।
यस्तै, दुवै आँखा नदेख्ने इटहरी १९ का सुभाष बस्नेतलाई शिविरकै अवसर पारेर नगद पाँच हजार रुपैयाँसमेत प्रदान गरिएको उनले बताए ।
शिविरमा लाभ लिएका इटहरी १९ का ईश्वर पुरीले अरु समयमा धरान गएर जाँच गरेपनि यसपटक भने आफ्नै गाउँघरमा सुगर जाँच गर्न पाउँदा खुशी लागेको बताए ।
६ वर्षदेखि सुगरका बिरामी रहेका उनले आफ्नै ठाउँमा भएको शिविरबाट लाभ लिएको बताए ।
स्थानीय दुर्गादेवी चौलागाईँले घर नजिकै शिविर हुँदा आँखा जाँच गराउन पाएकोमा हर्षित भएको बताइन् । कार्यक्रममा लायन्स क्लब अफ इन्टरनेशनलका डिस्ट्रिक गभर्नर विजयहरी शर्मा प्रमुख अतिथि रहेका थिए ।
लायन्स क्लबले स्कुलमा स्थानीय समुदाय र विद्यार्थीलक्षित शिविर सञ्चालन गर्दा आफूहरूलाईसमेत लाभ मिलेको फुजिसान सगरमाथा बोर्डिङ स्कुलका प्रधानध्यापक सूर्यप्रसाद चौलागाईँले बताए ।
कार्यक्रममा इटहरी १९ का वडाध्यक्ष श्रीनारायण चौधरी, इटहरी २० का वडाध्यक्ष मणिराम श्रेष्ठलगायतको सहभागिता रहेको थियो ।
Discussion about this post