इटहरी : सरकारले निजी क्षेत्रलाई प्रोत्साहन गर्ने नीति नल्याउँदा उद्योग व्यवसाय धरासायी बन्दै गएको व्यवसायीहरुले बताएका छन् ।
उनीहरूले विगतमा युवा पुस्ता विदेशिए पनि अब भने उद्योगी व्यवसायी नै विदेशिन थालेकोमा चिन्ता व्यक्त गरे ।
उद्योग वाणिज्य संघ इटहरीको २५ औं साधारणसभाका क्रममा शनिबार नेपाल उद्योग वाणिज्य महासंघ महासंघका केन्द्रीय अध्यक्ष चन्द्र ढकालले सरकारले उद्योगी व्यवसायीका निम्ति लगानी गर्ने वातावरण सुनिश्चित गर्नुपर्नेमा जोड दिए ।
उनले संघीय सरकारले आगामी आर्थिक वर्षको बजेट नीति तथा कार्यक्रममा उद्योगी व्यवसायीको हितमै भएतापनि कार्यान्वयन पक्षमा शंका गर्ने अवस्था रहेको बताए ।
‘निजी क्षेत्रको आर्थिक अवस्था सुधारोन्मुख रहेपनि अझै अफ्ट्यारो अवस्था छ,’ उनले भने, ‘बजेटमा केही बुँदा व्यवसायीको पक्षमा सम्बोधन भएपनि कार्यान्वयनको पक्ष हुनेमा शंका छ ।’
उनले निजी क्षेत्रले लगानीको वातावरण बनाउन राज्यले अझै काम गर्न नसकिरहेको बताए । पछिल्लो समय महासंघको विधानको विषयमा कुरा उठिरहेकाले पुसअघि नै विधान परिवर्तन हुनेसमेत उनको भनाइ छ ।
कार्यक्रममा महासंघका पूर्व अध्यक्ष चण्डीराज ढकालले सरकारले निजी क्षेत्रमाथि गर्ने माया प्रतिविम्ब नगरेमा शक्ति देखाउनुपर्ने आवश्यकता रहेको बताए । ‘यदि सरकारले निजी क्षेत्रलाई माया गर्दैन भने आफ्नो अधिकार खोज्न शक्ति देखाउनुपर्ने हुन्छ, विगतमा पनि थुप्रैपटक प्रदर्शन गरेर आफ्नो अधिकार सुनिश्चित गरिएको थियो ।’
यसैगरी नेपाल उद्योग वाणिज्य महासंघका उपाध्यक्ष सुरकृष्ण वैद्यले उद्योगी व्यवसायीले स्वच्छ किसिमको व्यापार गर्न चाहदा पनि सरकारी निकायले त्यस किसिमको वातावरण नबनाएको गुनासो गरे ।
‘उद्योगी व्यवसायीलाई तल पारेर नीति नियम बनाउनेहरुले दण्ड जरिवानाको व्यवस्था गर्ने गरिएको छ,’ उनले भने, ‘सरकारले स्पस्ट नीति नियम दिनुपर्छ ।’
यस्तै, केन्द्रीय उपाध्यक्ष हेमराज ढकालले कृषि, उत्पादन, पर्यटन, साना तथा मझौला उद्योगका लागि सरकारले अनुदान दिएर प्रोत्साहन गर्नुपर्नेमा जोड दिए ।
‘अहिलेको अवस्थामा उद्योग व्यापार चलायमान छैन,’ उनले भने, ‘यस्तो अवस्थामा सरकारले सहजीकरण गर्नुपर्छ ।’ उनले अहिले त उद्योगी व्यवसायी नै विदेशिन थालेकाले गर्दा आर्थिक रुपमा संरचनागत सुधार हुनुपर्नेमा जोड दिए ।
नेपाल उद्योग वाणिज्य संघ कोशी प्रदेशका अध्यक्ष राजेन्द्र राउतले निजी क्षेत्र यतिबेला हतोत्साहित भएकाले गर्दा बैंक पनि सहज ढंगले ऋण प्रवाह नगर्दा पुरै संकटमा गुज्रेको बताए । ‘कोशी प्रदेश उद्योगको हब रहेको भएपनि पूर्वाधार विकासमा सरकार उदासीन रहेको छ,’ उनले भने ।
कार्यक्रममा सुनसरीका प्रमुख जिल्ला अधिकारी रामचन्द्र तिवारीले उद्यमशील हुन चुनौती रहेको बताए । उनले निजी क्षेत्रमा पनि बेथिति रहेको र निजी क्षेत्र सुध्रिएमा सरकारसमेत सुध्रने जिकिर गरे । उनले भने, ‘उपभोक्ताको हितका निम्ति निजी क्षेत्रले काम गर्न आवश्यक रहेको छ ।’
सोही क्रममा विभिन्न क्षेत्रमा योगदान पु¥याउनेलाई सम्मान गरिएको थियो । जसमा कृषक अम्बिका कोइराला, व्यवसायी चेतबहादुर कार्की, मञ्चित श्रेष्ठ, नारायण राठी, राधेश्याम साह र सुशीला अधिकारीलाई सम्मान गरियो ।
यस्तै, इटहरी क्षेत्रमा सवैभन्दा बढी कर तिर्ने विश्व आदर्श कलेजलाई सम्मान गरिएको थियो । यसैगरी पत्रकारिता क्षेत्रमा योगदान पु¥याएकोमा विवेक विवश रेग्मीलाई नगद ११ हजार रुपैयाँसहित सम्मान गरिएको थियो ।
कार्यक्रममा उद्योग वाणिज्य संघ इटहरीका अध्यक्ष जीवन पराजुलीले संस्थाले गरेका कार्यहरू प्रस्तुत गरेका थिए ।
उनले विभिन्न रचनात्मक काम गरेको र आगामी दिनमासमेत व्यवसायीको हितमा काम गर्ने बताए ।
उवासंघ इटहरीका वरिष्ठ उपाध्यक्ष पीताम्बर पोखरेलको संयोजकत्वमा सम्पन्न कार्यक्रम महासचिव विनोद पौडेलले सञ्चालन गरेका थिए ।
Discussion about this post