इटहरी : बुधबार (असार १९) गते बिहानदेखि बेपत्ता भएका समालोचक डा. रामजी तिम्सिना अझै भेटिएका छैनन् । इटहरी २ आँपगाछी निसावी डा. तिम्सिना बुधबार बिहान घरबाट निस्किएको र हालसम्म बेपत्ता भएका छन् ।
उनले घरबाट निस्किुनअघि ‘म बराहक्षेत्रमा जलसमाधि लिदैँछु । अलबिदा ।’ लेखेर बेपत्ता भएका हुन् । उनले लेखेको त्यो चिर्कटो मुनि ‘मिति २०८१।०३।१९ बुधबार बिहान ४ः१८ बजे’ लेखिएको छ ।
त्रिभुवन विश्वविद्यालयका सह–प्राध्यापकसमेत रहेका तिम्सिना हालसम्म नभेटिनुले उनका शुभचिन्तकहरूले चिन्ता र चासो लिएका छन् ।
जिल्ला प्रहरी कार्यालय सुनसरीका प्रहरी उपरीक्षक (एसपी) विपिन रेग्मीका अनुसार बिहीबारदेखि उनको खोजी हालसम्म जारी राखिएको छ ।
‘बिहीबार प्रहरीमा खबर भएसँगै हालसम्म खोजी जारी छ,’ एसपी रेग्मीले टाकुरासँग भने, ‘हामीले आज (शनिबार)पनि खोजी ग¥यौँ । सप्तकोसी नदीमा आज गोताखोर टोली परिचालन भएपनि पत्ता लागेको छैन ।’
नदीमा पौडन सक्ने तालिम प्राप्त गरेका गोताखोर टोलीबाट खोजी जारी राखिएको उनको भनाइ छ ।
उनका अनुसार तिम्सिनाको पछिल्लोपटक फोनको ‘लोकेसन’ सुनसरीको बराहक्षेत्र मन्दिर आसपास रहेको थियो । उनी बेपत्ता भएदेखि नै शुक्रबार दिउँसोसम्म फोन लागिरहेको थियो । तर, शुक्रबार दिउँसोदेखि भने फोन ‘स्वीच अफ’ रहेको छ ।
आफूले ‘सप्तकोसीमा जलसमाधि लिने’ किसिमको आशय लेखेको पत्र भेटिएपछि प्रहरीले सप्तकोसी नदीमा खोजी कार्य गरेको थियो । नेपाल प्रहरीबाट तालिम प्राप्त प्रहरी, सशस्त्र प्रहरी र स्थानीयसँगको सहकार्यमा खोजी जारी राखिएपनि पत्ता लागेको छैन ।
यो समाचार तयार पार्दा (८ः४ बजेसम्म) तिम्सिना बेपत्ता छन् । ‘लोकेसन फाइन्डिङ भएको ठाउँमा खोजी गरेपनि हालसम्म केही पत्ता लागेको छैन,’ एसपी रेग्मीले भने ।
उनका शुभचिन्तकहरूले बेपत्ता भएकोमा चिन्ता व्यक्त गरेका छन् । शुक्रबारदेखि उनको खोजीका निम्ति धेरैले चासो राखेका छन् । तिम्सिना धरानस्थित महेन्द्र बहुमुखी क्याम्पस र इटहरीस्थित कोसी कलेजमा अध्यापनरत छन् । उनी अङ्ग्रेजी विभागमा पढाउँछन् ।
केही वर्षअघि मात्रै उनले डायस्पोरा साहित्यमा विद्यावारिधि गरेका तिम्सिना खासगरी समालोचना र रिसर्चमा रूचि राख्छन् । पारिवारिक स्रोतका अनुसार तिम्सिना बेपत्ता भएपछि इलाका प्रहरी कार्यालय इटहरीमा ‘खोजी गरिपाउँ’ भनेर निवेदन दिइएपछि बिहीबारबाट खोजी भइरहेको छ ।
घरका अरू कोही परिवार उठ्नु अगावै उनले चिर्कटो लेखेर कम्प्युटर नजिक राखेपछि बेपत्ता भएको पारिवारिक स्रोतले जनाएको छ ।
स्रोतका अनुसार बुधबार बिहान ६ः२६ बजे उनले आफ्नी आमाको नम्बरमा अन्तिमपटक फोन डायल गरेका थिए । तर, फोन तत्काल नउठेपनि लगत्तै ‘कल ब्याक’ गर्दा तिम्सिनाको फोन उठेन । त्यसपछि पटकपटक फोन सम्पर्क गर्दा उनको फोन नउठेको र हाल ‘स्वीच अफ’ रहेको छ ।
‘बुधबार बेलुका घर नफर्किएपछि बिहीबार प्रहरीमा खबर भयो,’ पारिवारिक स्रोतले भन्यो, ‘अचानक बेपत्ता हुँदा चिन्ता थपिएको छ ।’
जानकारहरूका अनुसार तिम्सिना अति अध्ययनशील मानिस हुन् । रिचर्सको क्षेत्रमा पत्याइएका उनलाई धेरै साहित्यकारहरूले कुशल समालोचकका रूपमासमेत चिन्छन् ।
तिम्सिना अचानक बेपत्ता हुनुको कारणबारे भने उनी निकटहरू नै हालसम्म आश्चर्यचकित छन् ।
यो पनि – इटहरी निवासी समालोचक डा. रामजी तिम्सिना ‘जलसमाधि लिदैँछु, अलबिदा’ लेखेर बेपत्ता
Discussion about this post