इटहरी : सुनसरीको विभिन्न स्थानहरूबाट प्रतिबन्धित लागूऔषधसहित सात जनालाई प्रहरीले पक्राउ गरेको छ ।
लागूऔषध नियन्त्रण ब्यूरो विराटनगर र इलाका प्रहरी कार्यालय लौकही सुनसरीको संयुक्त प्रहरी टोलीले पक्राउ गरेको हो ।
कोशी गाउँपालिका १ छोटी भन्सार कार्यालय अगाडिबाट भोक्राहा नरसिंह गाउँपालिका २ का १९ वर्षीय साजन सदालाई १ ग्राम ९० मिलिग्राम लागूऔषध ब्राउनसुगरसहित पक्राउ गसरएको हो ।
यसैगरी बराहक्षेत्र नगरपालिका ९ का २२ वर्षीय शिव चन्द्रवंशी र २० वर्षीय अभिषेक चन्द्रवंशीलाई २ ग्राम लागूऔषध ब्राउनसुगरसहित पक्राउ गरिएको छ ।
यसैगरी भारतबाट नेपालतर्फको १४ प १९१७ नम्बरको मोटरसाइकलमा आउँदै गरेका भोक्राहा नरसिंह ५ का १९ वर्षीय नजाम मन्सुरीलाई ८३ मिलिग्राम लागूऔषध ब्राउनसुगरसहित पक्राउ गरिएको छ ।
यस्तै, प्रदेश १-०१-०१३ प ७६१५ नम्बरको मोटरसाइकल चालक इटहरी उपमहानगरपालिका २ का ४० वर्षीय अमित गुरुङ र पछाडि सवार ४० वर्षीय हुकुम राईलाई १ ग्राम ६ मिलिग्राम लागूऔषध ब्राउनसुगरसहित नियन्त्रणमा लिएको कोशी प्रदेश प्रहरी कार्यालय विराटनगरले जनाएको छ ।
उता, इलाका प्रहरी कार्यालय चतराले लागूऔषध ट्रामोल २६ क्याप्सुलसहित बराहक्षेत्र नगरपालिका २ का ३३ वर्षीय पवन राईलाई नियन्त्रणमा लिएको छ ।
प्रतिबन्धित लागूऔषधसहित पक्राउ परेका सबैजनाको सम्बन्धित प्रहरी कार्यालयहरूबाट थप अनुसन्धान भइरहेको प्रहरीले जनाएको छ ।
Discussion about this post