इटहरी : कृषि शिक्षामा संलग्न विद्यार्थीहरूलाई ज्ञान आदान–प्रदान, सञ्जाल विस्तार र नवप्रवर्तनमा सक्रिय बनाउन लक्षित गर्दै ‘नेक्सको २०२५’ राष्ट्रिय सम्मेलन शुक्रवारदेखि आइतवारसम्म आयोजना हुँदैछ।
आइ.ए.ए.एस.नेपालअन्तर्गत रहेको एल.सी लमजुङको संयोजनमा कार्यक्रम आयोजना हुन लागेको हो।
‘नेक्सको २०२५’मा देशभरका १३ भन्दा बढी शिक्षण संस्थाबाट करिब ६० जना कृषि विषयका विद्यार्थीहरूको सहभागिता हुने अपेक्षा गरिएको नेशनल एक्सचेन्ज कोअर्डिनेटर प्रभाव कटवालले जानकारी दिए ।
उनका अनुसार कार्यक्रमको तयारी अन्तिम चरणमा छ । कार्यक्रममा विज्ञ प्रवचन, प्यानल छलफल, समूहगत प्रस्तुति, साँस्कृतिक साझ, कृषि उत्पादन प्रदर्शनी, फिल्ड भ्रमण, र लिलामी साझ जस्ता आकर्षक गतिविधिहरू समावेश गरिएको उनले बताए ।
“नेक्सको केवल एउटा सम्मेलन होइन, यो कृषि क्षेत्रका भावी कर्णधारहरूबीच अन्तरक्रिया, विचार आदान–प्रदान र दीर्घकालीन सहकार्यको थालनी हो,” कटवालले भने ।
छात्रछात्राहरूले कृषि अनुसन्धान, स्मार्ट फार्मिङ, दिगो उत्पादन प्रणाली, र उद्यमशीलताको अवधारणा लगायतका समसामयिक विषयहरूमा कार्यशालामार्फत छलफल गर्नेछन्।
कार्यक्रमको दोस्रो दिन ‘साँस्कृतिक साँझ’ आयोजना गरिनेछ । जसमा सहभागी विद्यार्थीहरूले आ–आफ्ना पारम्परिक पोसाक, नाच, र गीत प्रस्तुत गर्नेछन्। यसले नेपालको सांस्कृतिक विविधता झल्काउने र सहभागिता भावना थप बलियो बनाउने अपेक्षा गरिएको उनले जनाए ।
तेस्रो दिनको अन्त्यमा सहभागीहरूले नवीनतम आइडिया, परियोजना वा उत्पादनहरू प्रस्तुति सहित लिलामीमा राख्नेछन् । जसले उद्यमशील सोचलाई प्रोत्साहन गर्ने विश्वास लिइएको छ।
संस्थाले कृषि विषयमा अध्ययनरत विद्यार्थीहरूलाई नेतृत्व विकास, सांस्कृतिक आदान–प्रदान, र अनुसन्धानमा सहभागी गराउने उद्देश्य राखेको छ।
‘नेक्सको २०२५’ सम्मेलन मात्र नभई, कृषि शिक्षाको उत्सव रहेकाले नवप्रवर्तन, सहकार्य र दिगोपनका लागि युवालाई सशक्त बनाउने कटवालले विश्वास व्यक्त गरे ।
Discussion about this post