इटहरी : इटहरी उपमहानगरपालिका–२, पाथीभरा टोल निवासी ३४ वर्षीय डेकेन्द्र धमला बेपत्ता भएका छन्।
उनी असार ८ गते बिहान ४ बजे घरबाट निस्किएपछि अहिलेसम्म सम्पर्कमा आएका छैनन्। बिहानै मोरङको बाँसबारीतर्फ गाडी चलाउन जान्छु भनी हिँडेका धमला घरबाट निस्किएपछि सम्पर्कविहीन भएपछि परिवार चिन्तित बनेको छ।
धमलाको खोजीका लागि परिवारका तर्फबाट इलाका प्रहरी कार्यालय इटहरीमा निवेदन दिइएको छ।
प्रहरीका अनुसार आवश्यक खोजतलास कार्य अघि बढाइएको छ। हालसम्म उनी कहाँ छन् भन्ने कुनै जानकारी प्राप्त नभएको प्रहरीले जनाएको छ।
इलाका प्रहरी कार्यालय इटहरीका प्रमुख प्रहरी निरीक्षक महेन्द्र पराजुलीले हस्ताक्षर गरेको सार्वजनिक सूचनामा धमलाको हुलियासमेत उल्लेख गरिएको छ। सूचनाअनुसार उनी गोरो वर्णका, उचाइ करिब ५ फिट ३ इन्च, तौल करिब ५५ केजी, आँखा र कपाल कालो रंगको रहेको जनाइएको छ।
कसैले उनलाई देखेको वा उनीबारे जानकारी पाएको खण्डमा नजिकको प्रहरी कार्यालयमा खबर गर्न वा उनका भाइ किशोर धमलालाई फोन नम्बर ९८४२५८८३८७ मा सम्पर्क गर्न आग्रह गरिएको छ।
Discussion about this post