इटहरी : सुनसरीमा भएको दुर्घटनामा मृत्यु हुनेको संख्या पाँच पुगेको छ । थप एकजनाको मृत्यु भएसँगै घटनामा पाँच जनाको मृत्यु भएको हो ।
झापाको काँकडभिट्टाबाट खोटाङको दिक्तेलतर्फ जाँदै गरेको मे १ ख १७९९ नम्बरको बस र विपरीत दिशाबाट आउँदै गरेको प्र २–०१–००१ ज ००४७ नम्बरको माइक्रो सोमबार बिहान ७ः१५ बजेतिर पूर्व–पश्चिम राजमार्ग अन्तर्गत सुनसरीको भोक्राहा नरसिंह गाउँपालिका–३ जलुवाटोलमा दुर्घटना भएको थियो ।
दुर्घटनामा सप्तरीको मधावे गाउँपालिका–६ बस्ने ३५ वर्षीय शंकर मण्डल, सुनसरीको कोशी गाउँपालिका–६ बस्ने ७० वर्षीय लक्ष्मण सदा, विराटनगर महानगरपालिका–१० बस्ने ४० वर्षीय अशोक यादव, सप्तरीको तिरहुत गाउँपालिका–३ बस्ने ६० वर्षीया अनारवतीदेवी यादव र सप्तरीकै गोईठी गाउँपालिका–३ बस्ने ६८ वर्षीय जिवछ महात्माको मृत्यु भएको हो ।
महात्माबाहेक चार जनाको बिहान नै निधन भएपछि उनको भने उपचारको क्रममा सोमबार दिउँसो निधन भएको जिल्ला प्रहरी कार्यालय सुनसरीका प्रहरी उपरीक्षक (एसपी) सुमनकुमार तिम्सिनाले जानकारी दिए ।
उनका अनुसार मण्डल, सदा र यादवको सुनसरीस्थित ग्लोबल कार्डियो एण्ड न्यूरो अस्पताल भोक्राहामा मृत्यु भएको हो ।
यसैगरी अनारवतीदेवीको जिल्ला अस्पताल इनरुवा र महात्माको भने नोबेल अस्पताल विराटनगरमा उपचारको क्रममा मृत्यु भएको एसपी तिम्सिनाले बताए । मृतक सबैको शव आफन्तले बुझेर लगेको प्रहरीको भनाइ छ ।
घटनामा घाइते भएकामध्ये उपचारपछि ७ जना डिस्चार्ज भएका छन् भने बाँकी १६ को उपचार भइरहेको छ ।
राजविराजबाट विराटनगरतर्फ आउँदै गरेको माइक्रो तीव्र गतिमा रहेको र सोही अवस्थामा अर्को सवारीसाधनलाई ओभरट्याक गर्ने क्रममा विपरीत लेनबाट आउँदै गरेको बसमा ठक्कर भएर दुर्घटना भएको प्रारम्भिक अनुसन्धानबाट खुलेको छ ।
Discussion about this post