इटहरी : आसन्न प्रतिनिधिसभा निर्वाचनलाई लक्षित गर्दै इटहरीमा ‘प्रदेश खबर डटकम’ले आयोजना गरेको अन्तरक्रिया कार्यक्रममा पत्रकार सुरक्षाको विषय प्रमुख एजेन्डा बनेको छ।
कोशी प्रदेशका विभिन्न स्थानका पत्रकारहरूले यसपटकको निर्वाचनमा फिल्ड रिपोर्टिङ थप जोखिमपूर्ण बन्न सक्ने धारणा राखे।
झापामा रिपोर्टिङका क्रममा पत्रकारमाथि भएको हातपात घटनालाई उदाहरण दिँदै पत्रकार किशोर बुढाथोकीले सुरक्षा अवस्था चुनौतीपूर्ण बन्दै गएको बताए।
प्रेस युनियन कोशी प्रदेशका महासचिव सञ्जीव वाग्लेले निर्वाचन सुरक्षाको नेतृत्व नेपाली सेनाले गर्ने सन्दर्भमा पत्रकार–सुरक्षाकर्मी समन्वयमा जटिलता आउन सक्ने उल्लेख गरे।
अघिल्ला निर्वाचनहरूमा नेपाल प्रहरी र सशस्त्र प्रहरी बलसँग रहेको प्रत्यक्ष समन्वय सेनासँग तुलनात्मक रूपमा कम हुने भएकाले रिपोर्टिङमा अप्ठ्यारो हुन सक्ने उनको भनाइ थियो।
पत्रकार अञ्जनी कुमार घिमिरे र प्रकाश पाक्सावाले चुनावी वातावरणमा फिल्ड रिपोर्टिङ गर्दा विशेष सतर्कता आवश्यक रहेको बताए। सुरक्षाकर्मी नै उच्च सतर्कतामा रहने अवस्थामा पत्रकार झनै जोखिममा पर्न सक्ने उनीहरूको धारणा थियो।
कार्यक्रममा सहभागी सरोकारवालाले प्रेस पास, सवारी पास तथा परिचयपत्र अनिवार्य रूपमा साथमा राख्न आग्रह गरेका छन्। साथै, निर्वाचन अवधिमा उत्कृष्ट रिपोर्टिङ गर्ने संवाददातालाई ‘टप अफ द मन्थ’ घोषणा गरी पुरस्कृत गरिने जानकारी पनि दिइयो।
नयन मिडिया एण्ड एड्भरटाइजिङ प्रालिका अध्यक्ष तथा प्रदेश खबरका सम्पादक पवन अधिकारीले निर्वाचन लक्षित रिपोर्टिङका क्रममा पत्रकारमाथि आक्रमण हुनु गम्भीर विषय भएको बताए।
प्रदेश खबरका समाचार प्रमुख कृष्ण भट्टराई जुनेलीले पत्रकारहरूले आफ्नो सुरक्षामा स्वयं सचेत रहँदै सत्य तथ्य र निष्पक्ष ढङ्गले रिपोर्टिङ गर्नुपर्ने बताए।
कार्यक्रमको निष्कर्षमा पत्रकारमाथि हुने आक्रमण गम्भीर विषय भएकाले सम्बन्धित निकायसँग समन्वय गरी सुरक्षित र सहज वातावरण निर्माण गर्नुपर्नेमा जोड दिइएको थियो।
साथै सोही कार्यक्रममा प्रेस ज्याकेट र परिचयपत्र वितरणसमेत गरिएको थियो।
Discussion about this post