इटहरी : सुनसरी जिल्ला अदालतबाट विभिन्न मितिमा भएका फैसला कार्यान्वयनका क्रममा प्रहरीले दोषी ठहर भई फरार रहेका दुई जनालाई पक्राउ गरेको छ ।
जिल्ला प्रहरी कार्यालय सुनसरी तथा मातहतका प्रहरी इकाइबाट खटिएको टोलीले अदालतको फैसला कार्यान्वयनका लागि खोजी गर्ने क्रममा उनीहरूलाई पक्राउ गरेको हो ।
पक्राउ पर्नेमा भोजपुरको हतुवागढी गाउँपालिका–७ का राम राई रहेका छन् । जबरजस्ती करणी सम्बन्धी कसुरमा अदालतबाट दोषी ठहर भएका राईलाई तीन लाख जरिवाना र सात वर्ष कैद सजाय तोकिएको थियो । उनको फैसला २०८२ साल मंसिर २९ गते भएको थियो ।
त्यस्तै, चोरी मुद्दामा दोषी ठहर भएका सुनसरीको बराहक्षेत्र नगरपालिका–१ का पृथ्वी राई पनि पक्राउ परेका छन् । अदालतले उनलाई १० हजार जरिवाना र छ महिना कैद सजाय सुनाएको थियो । उनको फैसला २०८० साल चैत २८ गते भएको थियो ।
प्रहरीका अनुसार अदालतबाट भएका फैसला कार्यान्वयनलाई प्रभावकारी बनाउन फरार प्रतिवादीको खोजी तथा पक्राउ अभियानलाई निरन्तरता दिइएको छ ।
Discussion about this post