खोटाङ र मोरङका दुई छुट्टाछुट्टै स्थानमा आज विहान भएको सवारी दुर्घटनामा परी २ जनाको मृत्यु भएको छ ।
खोटाङको रावाबेशी गाउँपालिका १ डुम्रेपानीमा को ७ त ४७२७ नम्बरको ट्याक्टर दुर्घटना हुँदा ट्याक्टरका सहचालक स्थानीय २६ बर्षीय राजन नेपालीको मृत्यु भएको हो ।
पार्किङ गरेर राखेको ट्याक्टरलाई सहचालकले चलाएर लैजाने क्रममा सडकबाट अन्दाजी ५० मिटर तल खसेर दुर्घटना हुँदा घाईते भएका उनलाई स्थानीय मेडिलकमा उपचार गरी थप उपचारको लागि अस्पताल लैजाने क्रममा मृत्यु भएको जिल्ला प्रहरी कार्यालय खोटाङले जनाएको छ ।
यस्तै, मोरङको कटहरी गाउँपालिका ३ मा तेलको ट्याङकरको ठक्करबाट मोटरसाईकल चालकको मृत्यु भएको छ ।
आज विहान सवा ९ बजेको समयमा पूर्वबाट पश्चिम तर्फ जाँदै गरेको प्रदेश १–०२–०४२ प ९५५९ नम्बरको मोटरसाईकललाई सोही दिशाबाट जाँदै गरेको ना ५ ख ८४३४ नम्बरको तेल बोक्ने ट्याङकरले पछाडीबाट ठक्कर दिंदा घाईते भएका मोटरसाईकल चालक स्थानीय २१ बर्षीय रोहित शाहलाई उपचारको लागि कोशी अस्पताल लगिएकोमा उपचारको क्रममा मृत्यु भएको जिल्ला प्रहरी कार्यालय मोरङले जनाएको छ ।
Discussion about this post