इटहरी : श्रीकृष्ण जन्माष्टमी उत्सवलाई समापनका लागि गरिने श्रीकृष्ण रथयात्रा इटहरीलगायत कोशीका विभिन्न जिल्लामा समापन गरिएको छ । हरेक साल कृष्ण जन्माष्टमीपछि रथयात्रा गर्ने प्रचलन रहेको छ । सुनसरीको इटहरीस्थित विराटनगर लाइनमा रहेको राधाकृष्ण मन्दिरको आयोजनामा हरेक साल रथयात्रा निकालिन्छ ।
यसपालि पनि श्रीकृष्ण रथयात्रामा हजारौँको सहभागितामा इटहरी बजार परिक्रमा गरेर रथयात्रा समापन गरिएको आयोजकले जनाएको छ । कोशी प्रदेशको सबैभन्दा ठूलो रथयात्राका रूपमा विराटनगरको रथयात्रालाई लिइने गर्छ । करीब दश हजार भक्तजनको उपस्थितिमा रथयात्रा यस वर्ष पनि निकालिएको छ । विराटनगर मेनरोड हुँदै बजार परिक्रमा गरी रथयात्राको समापन गरिएको छ ।
त्यसैगरी सुनसरीकै धरान, झापाको दमक र उदयपुरको गाईघाटलगायत बजार क्षेत्रमा पनि भक्तजनको उल्लेख्य सहभागितामा रथयात्रा निकालिएको थियो ।
गत श्रावण महिनामा सुनसरीको देवानगञ्जमा भएको हिन्दु मुस्लिम झडपपछि सुरक्षाका दृष्टिकोणले कोशी प्रदेश संवेदनशील मानिन्छ । प्रशासन संयन्त्र सजग रहँदै रथयात्रामा उल्लेख्य प्रहरी परिचालन गरेको थियो । सुरक्षा संयन्त्रको तैनाथीका कारण रथयात्रामा कुनै पनि मानवीय घटना भने हुन पाएन भने शान्तिपूर्वक समापन भएको छ ।
विराटनगरमा शान्तिसुरक्षामा खलल पुर्याउने ९० पक्राउ
विराटनगरमा आयोजित ऐतिहासिक राधाकृष्ण रथयात्राका क्रममा प्रहरीले ९० जनालाई पक्राउ गरेको छ । रथयात्रामा सहभागी तथा दर्शकहरूको भीड बढ्दै गएपछि सुरक्षा व्यवस्था कायम गर्ने क्रममा प्रहरीले उनीहरूलाई नियन्त्रणमा लिएको जनाएको छ ।
मोरङ प्रहरीका अनुसार रथयात्राका क्रममा शान्ति–सुरक्षा कायम राख्न तथा सम्भावित अवाञ्छित गतिविधि रोक्न सुरक्षा टोली परिचालन गरिएको थियो । पक्राउ परेकामध्ये केहीलाई अनुसन्धानपछि आवश्यक प्रक्रिया पूरा गरी छाडिने प्रहरीले जनाएको छ ।
विराटनगरमा पनि रथयात्रालाई व्यवस्थित र सुरक्षित बनाउन ठूलो सङ्ख्यामा सुरक्षाकर्मी परिचालन गरिएको थियो । स्थानीय प्रशासनले रथयात्रामा सहभागी सबैलाई अनुशासित भएर सहभागी हुन तथा सुरक्षाकर्मीलाई सहयोग गर्न आग्रह गरेको थियो ।
Discussion about this post