इटहरी : अखिल नेपाल फुटबल संघ (एन्फा) को आयोजनामा भइरहेको अण्डर १३ उमेर समूहको खेलाडी छनौट अन्र्तगत सुनसरीबाट ३५ जना छानिएका छन् ।
अखिल नेपाल फुटबल संघ एन्फा सुनसरीले इटहरी ९ स्थित जनता स्कूलको मैदानमा बिहीबार र शुक्रबार गरेको छनौट कार्यक्रमबाट ३५ जना अण्डर १३ खेलाडीहरु छानिएका हुन् ।
एन्फा सुनसरी अध्यक्ष केशव कार्कीका अनुसार एकसय २५ जनाको समूहबाट ३५ जना छनौट गरिएको हो । जिल्ला छनौटका लागि सहभागी भएका खेलाडी धरान, इटहरी, दुहबी, इनरुवा र बराहक्षेत्रबाट आएका थिए । जिल्लाबाट छनौट भएका ३५ जना खेलाडीले प्रदेश छनौटका लागि प्रतिष्पर्धा गर्न पाउने छन् ।
छनौटमा सहभागीहरुको जन्मदर्ताका साथै खेल प्रदर्शन हेरेर मात्र खेलाडी छनौट गरिएको एन्फा सुनसरीका प्रशिक्षक श्याम मानन्धरले बताए । अण्डर १३ मा सहभागी हुनको लागि २०६५ असोज १५ देखि २०६६ असोज १५ गतेभित्र जन्मिएको हुनुपर्ने प्रावधान थियो ।
एन्फाले २०७८ सालदेखि क्लबहरुसँग सहकार्य गरेर एकेडेमी सञ्चालन गर्ने भएको छ । ए डिभिजन क्लबहरुले अन्तर्राष्ट्रिय प्रतियोगिता खेल्नको लागि ए.एफ.सि.लाइसेन्स लिनुपर्ने हुन्छ ।
लाइसेन्स प्राप्त गर्नको लागि एकेडेमी सञ्चालन गर्नुपर्ने मापदण्ड छ । त्यसैले एन्फाले क्षेत्र, जिल्ला, प्रदेश हुदै राष्ट्रिय छनौटबाट छानिएका उत्कृष्ट बाल खेलाडीहरु क्लबले सञ्चालन गर्ने एकेडेमीमा पठाउनका लागि खेलाडी छनौट थालिएको एन्फा सुनसरी अध्यक्ष केशव कार्की बताउँछन् ।
Discussion about this post