इटहरी : इटहरी उपमहानगरपालिका ६ बाट नियन्त्रित लागूऔषध ब्राउनसुगरसहित ४ जनालाई प्रहरीले प्रकाउ गरेको छ ।
एक होटलमा लागूऔषधको कारोबार भइरहेको भन्ने गोप्य सूचनाको आधारमा १ नम्बर प्रदेश प्रहरी कार्यालयको अनुसन्धान समूह र इलाका प्रहरी कार्यालय इटहरीबाट गएको संयुक्त प्रहरी टोलीले ब्राउनसुगर सहित शनिवार राति चारजनालाई पक्राउ गरेको हो ।
पक्राउ पर्नेहरुमा बारा जिल्ला निजगढ नगरपालिका १२ घर भई इटहरी ५ बस्दै आएका २७ वर्षीय दीपक भनिने वीरेन्द्र राई, इटहरी ५ बस्ने १८ वर्षीय विवेक बस्नेत तथा अर्का एकजना १६ वर्षीय नाबालक नै रहेकाले प्रहरीले तत्काल नाम नखुलाएपनि अनुसन्धानको प्रक्रिया अगाडि बढाएको केसीले बताए ।
उनीहरुको साथबाट प्रहरीले ५६ ग्राम २०० मिलिग्राम लागूऔषध ब्राउनसुगर, तौल नाप्ने डिजिटल उपकरण १ थान, बिभिन्न कम्पनीको मोबाईल ३ थान, मोटरसाइकल १ थान र नगद दुई हजार समेत बरामद गरेको छ ।
पक्राउ परेका उनीहरुलाई सोधपुछ गर्ने क्रममा इटहरी ४ का २३ वर्षीय विवेक खड्काको समेत संग्लग्नता रहेको खुल्न आएसंगै खड्कालाई समेत २९ ग्राम ८०० मिलिग्राम ब्राउनसुगर र १ थान मोबाइलसहित प्रहरीले पक्राउ गरेको छ ।
पक्राउ परेका उनीहरुको सम्बन्धमा प्रहरीले थप अनुसन्धान गरिरहेको इलाका प्रहरी कार्यालय इटहरीले जनाएको छ ।
Discussion about this post