इटहरी : इलाका प्रहरी कार्यालय इटहरीमा कार्यभार सम्हालेका नयाँ डीएसपी खगेन्द्रबहादुर खड्काले यहाँ अपराधको ‘भोल्युम’ ठूलो रहेको बताएका छन् ।
आज (सोमबार) पत्रकारहरूसँगको परिचयात्मक कार्यक्रममा डीएसपी खड्काले भने, ‘इटहरी तीव्र रूपमा सहरीकरण बढ्दो छ, यहाँको डाटा हेर्दा पनि अपराधको भोल्युम ठूलै छ ।’
उनले आफू यसअघि पनि प्रहरी निरीक्षक रहँदा इटहरीमै बसेको हुनाले सुरक्षाको प्रत्याभूति हुनेगरी काम गर्ने बताए । उनका अनुसार जिल्लाभरमा इटहरीमा अपराधको डाटा बढी रहेको छ । एक आर्थिक वर्षमा मात्रै ४ सय बढी मुद्वा दर्ता भएको उनले बताए ।
शून्य सहनशीलतामा कसैसँग पूर्वाग्रह नराखी अपराध गर्नेलाई कानून बमोजिम कारबाही गर्न कुनै कसर बाँकी नराख्ने डीएसपी खड्काले बताए ।
‘हामी रातदिन खटेर छिटो, छरितो, सुलभ र सरल सेवा दिन प्रतिवद्व छौं,’ उनले भने, ‘प्रहरीको जिम्मेवारीमा रही स्थानीय नागरिकको समस्या पहिचान गरी सेवा दिनछौं ।’ स्थानीय मानिसका पहिचान अध्ययन गरेर सरल सेवा दिन आफू कटिबद्व रहेको उनले बताए ।
अहिले अपराध गर्नेको क्रियाकलाप परिवर्तित भएकाले आफूहरू समस्या पहिचान गर्नतर्फ लाग्ने उनको भनाई थियो ।
भिडियो
Discussion about this post