इटहरी : इटहरीमा उपचारका लागि आएका आफ्नै सालोको छुरा प्रहारबाट भिनाजुको हत्या भएको छ ।
इलाका प्रहरी कार्यालय इटहरीका मुद्वा शाखाका प्रहरी नायब निरीक्षक (सई) गोविन्द खवासका अनुसार इटहरी उपमहानगरपालिका ४ का ५१ वर्षीय मुरारी गिरीको आफ्नै सालोको छुरा प्रहारबाट हत्या भएको हो ।
उनका अनुसार गिरीको नोबेल अस्पताल विराटनगरमा मंगलबार राति निधन भएको हो । प्रहरीले बुधबार दिउँसो मात्रै घटनाबारे सार्वजनिक गरेको हो ।
भोजपुर जरायोटार घर भएका १९ वर्षीय सालो अर्जुन राईले मंगलबार दिउँसो करीब ४ बजेको समयमा गिरीलाई छुरा प्रहार गरेका थिए ।
‘भोजपुरबाट मानसिक समस्याको उपचार गराउन आएका उनलाई घरमै बाँधेर राखिएको रहेछ,’ उनले टाकुरासँग भने, ‘बाँधिएको हातको डोरी अचानक फुस्काएर भिनाजुमाथि छातीमै छुरा प्रहार गरेको प्रारम्भिक अनुसन्धानबाट खुलेको छ ।’
उनका अनुसार करीब चारदिनअघि उपचारका लागि भोजपुरबाट ल्याइएपनि कुन अस्पतालमा लैजाने भन्ने विषयमा निक्र्यौल नहुँदा घरमै डोरीले बाँधेर राखिएको थियो । तर, मंगलबार दिउँसो अचानक डोरी फुस्काएर छेउमा रहेको छुरा छातीमा प्रहार गर्दा गम्भीर घाइते भएका गिरीको मृत्यु भएको प्रहरीले जनाएको छ ।
मानसिक रोगीको समस्या भएका राईलाई पक्राउ गरी बुधबार कर्तव्य ज्यान मुद्वामा म्याद थप गरेर आवश्यक अनुसन्धान तथा कारबाही अगाडि बढाइएको प्रहरीले जनाएको छ ।
Discussion about this post