विराटनगर : अपहरण तथा शरीर बन्धक बनाएको आरोपमा मिटर ब्याजी एवं एमालेको भातृ संगठन युवा संघ विराटनगरका अध्यक्ष किरण लामाविरुद्ध प्रहरीले पक्राउ पूर्जी जारी गरेको छ ।
लामाले विराटनगर ८ का औषधी व्यवसायी नवल यादव र अभिषेक साहलाई शुक्रबार अपहरण गरी दिनभरी बन्धक बनाएको आरोप लागेको छ ।
मोरङ प्रहरीको अपराध अनुसन्धान ब्यूरोका डीएसपी टीका कार्कीका अनुसार लामाले साह र यादवलाई गत असार २९ मा ५ लाख रुपैयाँ ऋण दिएका थिए । उनीहरुले पटकपटक गरेर १३ लाख रुपैयाँ बुझाए पनि लामाले अझै २५ लाख रकम तिर्न बाँकी रहेको भन्दै धम्की दिंदै आएको खुलेको छ ।
साह र यादवले थप रकम तिर्न बाँकी नरहेको भने पनि लामाले थप २५ लाख रुपैयाँ लिन उनीहरुलाई फोन गरेर आफनै घरमा बोलाएर दिनभरी बन्धक बनाएको पाइएको कार्कीले बताए ।
प्रहरीका अनुसार लामाले उनीहरुलाई मिटर ब्याजमा रकम दिएको र साँवाको दोब्बर रकम दिंदा पनि थप रकम असुली गर्न बन्धक बनाएको पाइएको छ । लामा फरार छन ।
लामाविरुद्ध जिल्ला अदालतमा अदालतमा म्याद थप गरेर प्रहरीले पक्राउ पूर्जी जारी गरेको हो । पक्राउ पूर्जी जारी भएपछि उनको लामाको खोजी कार्य तीव्र पारिएको प्रहरीले जनाएको छ ।
Discussion about this post