इटहरी : उद्योग वाणिज्य संघ इटहरीको यही माघ २८ गते हुने निर्वाचनमा अध्यक्ष पदका लागि पाँचै जनाबीच प्रतिष्पर्धा हुने भएको छ ।
निर्वाचनका लागि बिहीबार मनोनयन दर्ता भएको थियो । उम्मेदवारी फिर्ता लिने समय आइतबार (आज) सम्म रहेपनि अध्यक्ष पदका कुनै उम्मेदवारले पनि मनोनयन फिर्ता लिएनन् ।
अध्यक्ष पदका आकांक्षीहरू जीवन पराजुली, गायत्री कटवाल (भण्डारी), रञ्जु सिग्देल, पीताम्बर पोखरेल र मणिन्द्रकुमार कटवालले उम्मेदवारी दिएका छन् ।
उनीहरू कसैले पनि मनोनयन फिर्ता लिने समयसम्म फिर्ता नलिएपछि पाँचैजनाबीच प्रतिष्पर्धा हुने निर्वाचन समितिका सदस्य पोषराज नेपालले जानकारी दिए ।
‘उम्मेदवारी फिर्ता लिने समय आजसम्म थियो, तर पाँचजनामध्ये कसैको पनि उम्मेदवारी फिर्ता भएन,’ नेपालले भने, ‘सदस्य पदका तीनजनाको उम्मेदवारी फिर्ता भएको छ ।’
नेपालका अनुसार सदस्यका आकांक्षी तीनजनाले भने उम्मेदवारी फिर्ता लिएका छन् । वाणिज्यतर्फका सदस्य नवराज काफ्ले, उद्योगतर्फका प्रदीप अधिकारी र निर्मल रिजालले उम्मेदवारी फिर्ता लिएका हुन् ।
यससँगै उद्योगतर्फ ४ पदका लागि १० जनाबीच प्रतिष्पर्धा हुने भएको छ ।
यस्तै, वाणिज्यतर्फ भने ९ पदका लागि २५ जनाबीच प्रतिष्पर्धा हुने भएको छ । यसअघि एसोसिएट्सतर्फ भने राजीव घिमिरे निर्विरोध निर्वाचित भएको निर्वाचन समिति सदस्य नेपालले बताए ।
यस्तै, वस्तुगत सदस्यमा दुईजना आवश्यक पर्दा ६ जनाको उम्मेदवारी कायम छ ।
यही माघ २८ गते जनता बहुमुखी क्याम्पसमा बिहान ९ बजेदेखि दिउँसो ४ बजेसम्म निर्वाचनको कार्यक्रम तय गरिएको छ ।
सरकारी निकायबाट परिचय खुल्ने सक्कल कागजात बोकेर मतदानमा सहभागी हुनका लागि निर्वाचन समितिले अनुरोध गरेको छ ।
यो पनि – उद्योग वाणिज्य संघ इटहरीको अध्यक्षमा पाँचजनाको उम्मेदवारी, कुन पदमा कति जनाले गरे मनोनयन ?
Discussion about this post