इटहरी : इटहरीको मुख्य चौकमै उपमहानगरले डोजर चलाएको छ ।
आइतबार इटहरी उपमहानगरपालिकाका मेयर हेमकर्ण पौडेलको उपस्थितिमा राजमार्गमा पर्ने भवनमा डोजर चलाइएको हो ।
यसअघि उपमहानगरले इटहरी ९ नं. वडाका १४ घरहरूमा डोजर चलाएको थियो । आइतबारबाट भने इटहरी ६ नं. वडामा डोजर चलाइएको मेयर पौडेलले जानकारी दिए ।
वडा नं. ६ मा पर्ने ३४ वटा घर भत्काउन शनिबार सम्मको अल्टिमेटम दिइएको थियो । तर, कतिपयले अटेर गरेपछि मेयर पौडेल नेतृत्व टोलीले डोजर प्रयोग गरी घर भत्काएको हो ।
निर्माणाधीन ६ लेन सडक विस्तार गर्न आयोजनाले पटक–पटक ताकेता गर्दा पनि घर भत्काउन अटेर गरेपछि स्थानीय सरकारकै अगुवाईमा भत्काइएको हो ।
‘अटेर गर्नेहरूको कारण समग्र इटहरीको विकास २० वर्षपछि धकेलिन्छ,’ उनले भने, ‘इटहरीको मुख्य बजार क्षेत्रको चौरास्त चोकभन्दा दक्षिणतर्फ विराटनगर लाइनको बसपार्कसम्म झन्डै तीन सय मिटर सडक विस्तार हुन अझै बाँकी छ ।’
सार्वजनिक सडक र जग्गा ओगटेर बनाएका भवनहरू अब नियमित रूपमा उपमहानगरले भत्काउने मेयर पौडेलले बताए ।
इटहरीको मुख्य चौकदेखि उत्तर तरहरातर्फ ६ लेन सडकको काम सकिएपनि दक्षिणी क्षेत्र विराटनगर लाइनमा भने बाँकी नै रहेको छ ।
छ लेन सडक विस्तार आयोजनाका अनुसार इटहरी बजारदेखि उत्तरतर्फ सेनाको मुख्यालयसम्म २०–२० मिटर सडक विस्तार गर्न घर भत्काउनु पर्दैन । फुटपाथ बनाउन भने घर पनि भत्काउनुपर्छ । तर, अहिले त्यो काम अगाडि बढेको छैन ।
इटहरी बजारको चौरास्त चोकभन्दा दक्षिणतर्फ भने अहिले २० मिटर सडक छ । यसमा सरोकारवालासँग भएको सहमति अनुसार दुवैतर्फ १५–१५ मिटर विस्तार गर्ने निर्णय भएपनि घर नभत्काउँदा सडक विस्तार हुन सकेको थिएन ।
अब भने वडा नं. ६ का अन्य घर पनि केही दिनभित्रमै भत्काउने उमहानगरपालिकाले जनाएको छ । पछिल्लो समय सडक निर्माणका लागि २०८० सम्म समय अवधि थपिएको छ । थपिएको समयमा सडक निर्माण पूरा हुने छ लेन सडक विस्तार आयोजनाको दाबी छ ।
२०६९/०७० बाट सुरु भएर सात वर्षभित्रमा छ लेन सडक बिस्तार गर्ने लक्ष्य राखिएको थियो । तर, समयमै काम सम्पन्न नभएपछि पछिल्लो पटक समय थप गरिएको हो ।
Discussion about this post