मोरङ : मोरङको जहदा गाउँपालिकामा पाँच जना छात्रालाई बालयौन दुर्व्यवहार गरेको आरोपमा एक जना शिक्षक पक्राउ परेका छन् ।
जहदा गाउँपालिकास्थित जनप्रिय आधारभूत विद्यालयमा अध्ययरत पाँच जना छात्रालाई दुव्यर्वहार गरेको आरोपमा जहदा १ कुल्हडिया टोल बस्ने २७ वर्षे शिक्षक विकाशकुमार साह पक्राउ परेका हुन् ।
साहले पछिल्लो पटक जेठ ३२ गते एक छात्रालाई यौन दुर्व्यवहार गरेको उजुरी परेको छ ।
पाँच जना छात्रालाई यौन दुर्व्यवहार गरेको आरोप लागेका साह करारमा नियुक्त भएका शिक्षक हुन् ।
उनले कक्षा ४ देखि ८ सम्म विज्ञान विषय पढाउँदै आएका छन् । उनीमाथि गतवर्ष पनि विद्यार्थीहरुलाई दुर्व्यवहार गरेको आरोप लागेको थियो । त्यसबेला स्कुलमा घटना मिलाइएको थियो ।
दोस्रो पटक पाँचजना छात्रामाथि दुर्व्यवहार गरेको घटना बाहिरिएपछि उनीविरुद्ध पीडित छात्राका अभिभावकले प्रहरीमा उजुरी दिएका छन् ।
‘होमवर्क मिलेन भन्दै सर्टभित्र हात लैजाने तिघ्रा सुम्सुम्याउने, चिमोट्ने जस्ता यौनजन्य दुर्व्यवहार पटक पटक गर्दै आएका थिए,’ अभियोगपत्रमा उल्लेखछ ।
मोरङ प्रहरीमा बालयौन दुरुपयोगको मुद्दामा जाहेरी दर्ता गराएका छात्राहरुले यसअघि पनि दुर्व्यवहार गर्ने गरेको बताएका छन् ।
Discussion about this post