इटहरी : स्व. कृष्णप्रसाद भट्टराई स्मृति गोल्डकपको तेस्रो क्वाटरफाइनल खेलमा लोहोरुङ फुटबल क्लब संखुवासभा सेमिफाइनलमा प्रवेश गरेको छ ।
शनिबार भएको खेलमा लोहोरुङले चारतारे फुटबल क्लब लेटाङ, मोरङलाई १–० गोल अन्तरले पराजित गर्दै सेमिफाइनलका लागि सिट सुरक्षित गरेको हो ।
खेलको ३१ मिनेटमा लोहोरुङका लागि सुनील खड्काले १ गोल गरेका हुन् । त्यसपछि दुवै टिमबाट गोल हुन नसकेपछि उनै खड्काको गोल नै निर्णायक बन्यो । खेलको म्यान अफ दि म्याच उनै खड्का घोषित हुँदै नगद पाँच हजार प्राप्त गरे ।
प्रतिस्पर्धात्मक भएको खेलमा दुवै टिमका खेलाडीले पटकपटक अवसर गरेपनि गोल गर्नबाट चुके ।
कोशी प्रदेशस्तरीय प्रतियोगिताको इटहरी ५ स्थित जनता बहुमुखी क्याम्पसको खेल मैदानमा भइरहेको छ । अब लोहोरुङले बिहीबार विजयी बनेको दमक एकेडेमी फुटबल क्लबसँग सोमबार प्रतिस्पर्धा गर्नेछ ।
आइतबार गाइघाट फुटबल क्लब उदयपुर र सिंहदेवी फुटबल क्लब धनकुटाबीच प्रतिस्पर्धा हुनेछ ।
आयोजक द योङ ब्रदर्श क्लबका अध्यक्ष विजय सुब्बाका अनुसार प्रतियोगिताको विजेता टिमले नगद दुई लाख ५० हजार प्राप्त गर्नेछ । उपविजेता टिमले नगद एक लाख ३० हजारमा चित्त बुझाउनेछ ।
अघिल्लो वर्ष विजेतालाई दुई लाख २२ हजार प्रदान गरिएको थियो भने उपविजेताले एक लाख ११ हजार रुपैयाँ प्राप्त गरेका थिए । तर, यस वर्ष पुरस्कार राशि बढाइएको उनले बताए ।
प्रत्येक खेलको म्यान अफ दि म्याच हुने खेलाडीलाई नगद पाँच हजार प्रदान गरिनेछ ।
यसैगरी विधागततर्फ सर्वोत्कृष्ट खेलाडीलाई नगद १० हजार, उत्कृष्ट गोलरक्षकलाई नगद १० हजार, उत्कृष्ट डिफेन्डरलाई नगद १० हजार, उत्कृष्ट मिड फिल्डरलाई नगद १० हजार, उत्कृष्ट स्ट्राइकरलाई नगद १० हजार र सर्वाधिक गोलकर्ता खेलाडीलाई नगद १० हजारसहित ट्रफी र मेडलसहित प्रमाणपत्र वितरण गरिने खेल संयोजक एवम् क्लबका संरक्षक विकास केसीले जानकारी दिए ।
प्रतियोगितामा २२ लाख ५५ हजार रुपैयाँ खर्च हुने अनुमान गरिएको उनले जनाए ।
Discussion about this post