तरहरामा इन्टरनेट तथा केवल तार व्यवस्थापन नगरे १० दिनभित्र हटाइने

तरहरा : इटहरी उपमहानगरपालिका वडा नं. २० तरहरा तथा वडाभित्रका तार व्यवस्थापन गर्न आग्रह गरिएको छ ।

वडाध्यक्ष मणिराम श्रेष्ठले एक सूचना जारी गर्दै इन्टरनेट तथा टेलिभिजनको केवल तार व्यवस्थापन गर्न सार्वजनिक सूचना जारी गरेका हुन् ।

पटकपटक जानकारी गराइएपनि इन्टरनेट तथा केवलको तार व्यवस्थापन नहुँदा समस्या हुँदै आएको छ । सूचना जारी भएको १० दिनभित्र तार व्यवस्थापन नगरे आफैँ हटाइने सूचनामा उल्लेख छ ।

‘नेपाल विद्युत प्रधिकरण र नेपाल टेलिकमले विस्तार गरिएको बिजुलीका पोल तथा टेलिकमका पोलहरूमा विभिन्न इन्टरनेट केवल तथा टि.भी. केवलले जथाभावी रूपमा केवल तारहरू झुन्डाई वडाको सौन्दर्यलाई असर पार्ने तथा बारम्बार दुर्घटना भइ मानवीय क्षतिसमेत भएको छ,’ सूचनामा भनिएको छ, ‘यो सूचना जारी गरिएको १० दिनभित्र वडा कार्यलयमा आएर सम्पर्क गरी तार व्यवस्थापन गर्नुहुन अनुरोध गरिन्छ ।’

उक्त समय अवधिभित्र तार व्यवस्थापन नभएमा उपमहानगरपालिका कार्यालयले प्रचलित कानुन अनुसारको कारवाही गरिने वडाध्यक्ष श्रेष्ठले जानकारी दिए ।

वडा सदस्य तनजु गुरुङ (सुरेश)ले आफूहरूले तार व्यवस्थापनका लागि पटकपटक आग्रह गरेपनि अटेर गरेको बताए ।

खासगरी इन्टरनेट कम्पनी र केवल तार व्यवस्थापनका लागि सम्बन्धित निकायलाई पटकपटक आग्रह गरिएको उनको भनाइ छ । तर, उनीहरूले अटेर गर्दै आएका छन् ।

जसले सहरको सौन्दर्यता नै कुरूप हुने र दुर्घटनासमेत हुनसक्ने जोखिम रहेको गुरुङले बताए ।

‘तार भुइँमा लत्रिएर लथालिङ्ग हुँदा दुर्घटनाको जोखिम बढ्दो छ,’ उनले भने, ‘अब पनि तार व्यवस्थापन नगरे हटाउनका निम्ति उपमहानगरसँग समन्वय गर्नेछौँ ।’