तरहरा : इटहरी उपमहानगरपालिका वडा नं. २० तरहरामा नागरिक सरोकार र गुनासो प्रत्यक्ष रूपमा सुन्न तथा सम्बोधन गर्न नागरिक सुनुवाई कार्यक्रम सम्पन्न भएको छ। सहभागीहरूले शान्ति, सुरक्षाको विषयमा प्रश्न उठाएका थिए ।
इलाका प्रहरी कार्यालय इटहरीको आयोजनामा र वडा नं. २० को सहकार्यमा आयोजित कार्यक्रममा जिल्ला प्रहरी कार्यालय सुनसरीका प्रमुख प्रहरी उपरीक्षक (एसपी) सुमन कुमार तिम्सिनाले प्रश्नको जबाफ दिए ।
वडाध्यक्ष मणिराम श्रेष्ठको अध्यक्षतामा सम्पन्न कार्यक्रममा कार्यक्रममा जिल्ला प्रशासन कार्यालय सुनसरीका शाखा अधिकृत केशव खतिवडा, इलाका प्रहरी कार्यालय इटहरीका प्रहरी निरीक्षक राजेन्द्र कुमार पौडेल, जिल्ला प्रहरी कार्यालयका प्रहरी निरीक्षक प्रकाश पराजुली, विभिन्न राजनीतिक दलका प्रतिनिधिहरू, बाल सञ्जाल, महिला सञ्जाल, स्थानीय व्यवसायी, सामाजिक अगुवा तथा स्थानीय बासिन्दाको उपस्थिति रहेको थियो।
कार्यक्रममा सहभागीहरूले स्थानीय प्रशासन, प्रहरी तथा जनप्रतिनिधिसमक्ष सडक सुरक्षाको अवस्था, न्याय सम्पर्क पहुँच, महिला हिंसा नियन्त्रण, सवारी दुर्घटना न्यूनीकरण, युवामा बढ्दो लागूऔषध प्रयोग र सार्वजनिक सेवा प्रवाहमा हुने ढिलाइ लगायतका विषयमा गुनासो, सुझाव र जिज्ञासा राखेका थिए।
एसपी तिम्सिनाले नागरिकको गुनासोलाई गम्भीर रूपमा लिने प्रतिबद्धता जनाउँदै प्रहरी प्रशासन सदैव जनताको पक्षमा क्रियाशील रहने बताए।
वडाध्यक्ष श्रेष्ठले गुनासोहरूप्रति आवश्यक ध्यान दिइने र समन्वयात्मक रूपमा समाधान खोजिने बताए। खासगरी उक्त कार्यक्रम शान्ति सुरक्षाको विषयमा रहेकाले सुरक्षाका सवालमा सुझाव राख्नसमेत उनले अनुरोध गरेका थिए ।
Discussion about this post