इटहरी : कोशी प्रदेश सरकारले पहिलोपटक प्रदेश राजस्व कार्यालय स्थापना गरी सञ्चालनमा ल्याएको छ।
प्रदेशभित्र राजस्व संकलनलाई प्रभावकारी र सहज बनाउन यो कार्यालय खोलिएको हो।
आर्थिक मामिला तथा योजनामन्त्री रामबहादुर राना मगरले आइतबार इटहरीमा कार्यालयको उद्घाटन गरे।
कार्यक्रममा मन्त्री रानाले प्रदेश सरकारले लक्ष्यअनुसार राजस्व संकलनमा चुनौती भोगिरहेको उल्लेख गर्दै नयाँ कार्यालयले त्यसमा टेवा पुर्याउने विश्वास व्यक्त गरे।
‘जनतालाई करको बोझ नपार्ने गरी नयाँ स्रोत पहिचान गरेर राजस्व संकलनमा सहजीकरण गर्ने कार्यालयको भूमिका रहनेछ,’ मन्त्री रानाले भने।
प्रदेश सरकारहरूमध्ये पहिलोपटक कोशीले यस्तो कार्यालय स्थापना गरेको उनको दाबी छ।
गत आर्थिक वर्षमा कोशी प्रदेशले ४ अर्ब ९८ करोड राजस्व संकलन गर्ने लक्ष्य लिएकामा ९८ प्रतिशत मात्र सफलता हासिल भएको थियो। चालु आर्थिक वर्षमा भने ५ अर्ब ५० करोड राजस्व उठाउने लक्ष्य लिइएको छ।
Discussion about this post