धरान : सुनसरीको देवानगञ्ज–३ कप्तानगञ्जमा भएको घटनापछि उत्पन्न सुरक्षा संवेदनशीलतालाई मध्यनजर गर्दै धरानस्थित श्री पिण्डेश्वर बाबाधाम समितिले यस वर्षको बोलबम मेलामा रात्रिकालीन पूजा तथा जल अर्पण स्थगित गर्ने निर्णय गरेको छ।
समितिका अध्यक्ष विकासकुमार बनेपालीद्वारा जारी विज्ञप्तिमा मुलुकमा विकसित पछिल्लो परिस्थितिका कारण रातिको समयमा मेला सञ्चालन गर्दा सुरक्षा जोखिम देखिएको उल्लेख गर्दै भक्तजनलाई बिहान ५ बजेदेखि मात्रै मन्दिरमा उपस्थित भएर जल अर्पण गर्न आग्रह गरिएको छ।
समितिले देवानगञ्जको कप्तानगञ्जमा भएको घटनाप्रति दुःख व्यक्त गर्दै गोली लागेर ज्यान गुमाएकाप्रति श्रद्धाञ्जली अर्पण गरेको छ। साथै शोकसन्तप्त परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ।
विज्ञप्तिमा सबै धर्मावलम्बीलाई धार्मिक सहिष्णुता कायम राख्न आग्रह गर्दै समस्याको समाधान वार्तामार्फत खोज्नुपर्नेमा जोड दिइएको छ।
समितिका अनुसार नेपालमा बोलबम मेलाको सुरुआत श्री पिण्डेश्वरबाट नै भएको मानिन्छ। प्राचीनकालदेखि चतरास्थित कोशी नदीको जल ल्याएर भगवान् पिण्डेश्वर शिवलाई अर्पण गर्ने परम्परा रहिआएको छ भने २०४०र४१ सालदेखि श्री पिण्डेश्वर बोलबम मेला निरन्तर आयोजना हुँदै आएको छ।
सामान्य अवस्थामा भक्तजन आइतबार रातिदेखि नै मन्दिर परिसरमा भेला भई सोमबार बिहान जल अर्पण गर्ने चलन रहे पनि यस वर्ष सुरक्षा कारण देखाउँदै रात्रिकालीन दर्शन र पूजा बन्द गरिएको समितिले जनाएको छ।
समितिले यस निर्णयबाट भक्तजनमा पर्न जाने असुविधाप्रति क्षमायाचना गर्दै सबैको सुरक्षा नै आफ्नो पहिलो प्राथमिकता रहेको स्पष्ट पारेको छ।
Discussion about this post