सुनसरी घटना : दुई मृतकको शव परिवारलाई बुझाइयो

इटहरी : सुनसरीको देवानगन्ज गाउँपालिका–३ कप्तानगन्जमा भएको गोलीकाण्डमा ज्यान गुमाएका दुई युवाको शव सरकार र पीडित पक्षबीच भएको सहमतिपछि शुक्रबार पोस्टमार्टम गरी परिवारलाई बुझाइएको छ।

यससँगै घटनापछि पाँच दिनदेखि रोकिएको अन्त्येष्टि प्रक्रिया अघि बढेको छ।

घटनामा मृत्यु भएका देवानगन्ज–४ का २५ वर्षीय ओमप्रकाश मेहता र देवानगन्ज–३ का २२ वर्षीय जयप्रकाश मेहताको शव विराटनगरस्थित न्यूरो अस्पतालको शवगृहमा राखिएको थियो।

बिहीबार राति भएको सहमतिपछि शुक्रबार कोशी अस्पतालमा पोस्टमार्टम सम्पन्न गरी आवश्यक कानुनी प्रक्रिया पूरा गरेर शव परिवारको जिम्मा लगाइएको मोरङ प्रहरी प्रमुख एसपी कवित कटवालले जानकारी दिए।

गृहमन्त्री सुधन गुरुङको उपस्थितिमा देवानगन्ज गाउँपालिकाको कार्यालयमा भएको वार्तामा सरकार र पीडित पक्षबीच सातबुँदे सहमति भएको थियो।

सहमतिअनुसार दुवै मृतकलाई सहिद घोषणा गर्ने प्रक्रिया अघि बढाइने, प्रत्येक परिवारलाई १० लाख रुपैयाँ राहत उपलब्ध गराइने, दोषीमाथि कानुनअनुसार कारबाही गरिने, परिवारका एक–एक जना योग्य सदस्यलाई रोजगारीको अवसर दिइने, छानबिन समितिको प्रतिवेदन कार्यान्वयन गरिने तथा मृतकको सम्झनामा स्मृति पार्क निर्माण गरिने प्रतिबद्धता जनाइएको छ।

सहमतिपत्रमा पीडित परिवारका तर्फबाट ओमप्रकाशका बुवा कृष्णदेव मेहता र जयप्रकाशका तर्फबाट नरेश मेहताले हस्ताक्षर गरेका छन् भने सरकारका तर्फबाट गृहमन्त्री गुरुङले हस्ताक्षर गरेका छन्।

गत आइतबार राति कप्तानगन्जमा दुई पक्षबीचको विवाद हिंसात्मक बनेपछि स्थिति नियन्त्रणमा लिन सशस्त्र प्रहरीले गोली चलाएको थियो।

घटनास्थलमै गम्भीर घाइते भएका ओमप्रकाशको सोही राति मृत्यु भएको थियो भने जयप्रकाशको उपचारका क्रममा बिहीबार विराटनगरस्थित न्युरो अस्पतालमा निधन भएको थियो।

घटनापछि सुनसरीका विभिन्न स्थानमा आगजनी, तोडफोड, लुटपाट र व्यक्ति लक्षित आक्रमण भएपछि स्थानीय प्रशासनले कर्फ्यु आदेश जारी गरेको थियो।

पछिल्ला दिनमा अवस्था सामान्य बन्दै गए पनि घटनाको प्रभाव मधेश प्रदेशसम्म पुगेको थियो।