इटहरी : उद्योग वाणिज्य संघ इटहरीको आगामी असार २७ गते हुने निर्वाचन नजिकिँदै जाँदा चुनावी सरगर्मी तीव्र बनेको छ।
यसपटक नेतृत्वका लागि विभिन्न राजनीतिक धार नजिक रहेका व्यवसायी समूहबीच प्रतिस्पर्धा देखिएको छ भने सदस्यता नवीकरण, मतदाता नामावली र मताधिकारका विषय पनि चुनावी बहसको केन्द्रमा रहेका छन्।
नेपाली कांग्रेस र नेकपा एमाले निकट व्यवसायीहरूको नैतिक समर्थन नवराज काफ्ले समूहलाई रहेको बताइए पनि दुवै दलबीच कुनै औपचारिक वा लिखित चुनावी गठबन्धन भने भएको छैन।
अर्कोतर्फ राष्ट्रिय स्वतन्त्र पार्टी (रास्वपा) र नेकपा (माओवादी केन्द्र) निकट व्यवसायीहरूले गायत्री कटवाल (भण्डारी) नेतृत्वको समूहलाई समर्थन गरेका छन्। रोचक पक्ष के छ भने काफ्ले र भण्डारी दुवै कांग्रेस निकट व्यवसायीका रूपमा चिनिन्छन्।
पछिल्ला केही कार्यकालदेखि संघको निर्वाचन थप प्रतिस्पर्धात्मक बन्दै गएको व्यवसायीहरू बताउँछन्। पहिले सीमित दायरामा हुने नेतृत्व चयन अहिले संगठन विस्तारसँगै प्रतिष्ठाको विषय बन्न थालेको छ।
निर्वाचनमा खर्च बढ्दै गएको, व्यवसायीहरू विभिन्न समूहमा विभाजित हुने क्रम बढेको तथा चुनावी अभियानसमेत व्यापक हुन थालेको व्यवसायीहरूको अनुभव छ।
यद्यपि, यसपटक राजनीतिक दलहरूले प्रत्यक्ष रूपमा कुनै आधिकारिक उम्मेदवार घोषणा नगरेको जनाइएको छ।
विभिन्न दलप्रति आस्था राख्ने व्यवसायीहरू आ–आफ्नो समूहमा खुले पनि निर्वाचनलाई दलगतभन्दा व्यवसायीको साझा हितसँग जोडेर हेर्नुपर्ने धारणा धेरै व्यवसायीले व्यक्त गरेका छन्। संघ राजनीतिक प्रभावभन्दा माथि उठेर व्यवसायीको साझा संस्था बन्नुपर्ने उनीहरूको भनाइ छ।
निर्वाचनको पूर्वसन्ध्यामा सदस्यता नवीकरण र मतदाता नामावलीको विषय पनि चर्चामा रहेको छ। विगतमा करिब ६ हजार ५ सय व्यवसायी मतदाता रहेको दाबी गरिँदै आएकोमा यस वर्ष करिब २ हजार ३ सय ७० जना व्यवसायीको मात्रै सदस्यता नवीकरण भएको इटहरी उद्योग वाणिज्य संघका अध्यक्ष जीवन पराजुलीले जानकारी दिए। उनका अनुसार विधानअनुसार सदस्यता नवीकरण गरेका व्यवसायीहरू मात्रै मतदान प्रक्रियामा सहभागी हुनेछन्।
निर्वाचन कार्यतालिका अनुसार असार ११ गते मनोनयन दर्ता हुने र त्यसपछि उम्मेदवारहरूले औपचारिक रूपमा चुनावी अभियान सुरु गर्ने पराजुलीले बताए। उनले निर्वाचन स्वस्थ, निष्पक्ष र मर्यादित वातावरणमा सम्पन्न हुने विश्वास व्यक्त गर्दै जुनसुकै पक्ष विजयी भए पनि व्यवसायीको हकहित र संस्थाको गरिमालाई प्राथमिकतामा राखेर काम गर्नुपर्ने बताए।
यता, केही व्यवसायीहरूले सदस्यता नवीकरणको प्रक्रियालाई लिएर असन्तुष्टि जनाउँदै सबै व्यवसायीलाई समान अवसर सुनिश्चित गरिनुपर्ने धारणा राखेका छन्। निर्वाचनलाई लिएर उठेका जिज्ञासा र चासोलाई पारदर्शी ढंगबाट सम्बोधन गर्न सके संघप्रति व्यवसायीहरूको विश्वास अझ मजबुत हुने उनीहरूको भनाइ छ।
इटहरी उद्योग वाणिज्य संघ स्थानीय व्यवसायीहरूको साझा संस्था भएकाले यसको नेतृत्व कसले सम्हाल्छ भन्ने विषयले व्यापारिक क्षेत्र मात्र होइन, स्थानीय आर्थिक गतिविधिसमेत प्रभावित पार्ने अपेक्षा गरिएको छ।
जसकारण यसपटकको निर्वाचनलाई व्यवसायीहरूले विगतका निर्वाचनभन्दा बढी चासोका साथ हेरिरहेका छन्।
निर्वाचन नजिकिँदै जाँदा उम्मेदवारहरूले व्यवसाय प्रवर्द्धन, लगानीमैत्री वातावरण, कर तथा नीतिगत सुधार, बजार व्यवस्थापन, व्यवसायीको सुरक्षा, बैंकिङ समस्या समाधानलगायत विषयलाई आफ्नो चुनावी एजेन्डा बनाउँदै मतदातासँग भेटघाटलाई तीव्र बनाएका छन्। यही कारण पनि इटहरीको व्यावसायिक क्षेत्रमा चुनावी सरगर्मी दिनप्रतिदिन बढ्दै गएको देखिन्छ।
व्यवसायीहरूका अनुसार नेतृत्वका लागि प्रतिस्पर्धा तीव्र बन्दै गएको छ। पछिल्ला केही कार्यकालदेखि निर्वाचन थप प्रतिस्पर्धात्मक र खर्चिलो बन्दै गएको चर्चा व्यवसायी वृत्तमा हुने गरेको छ।
साथै, पार्टीगत रूपमा छिन्नभिन्न भएर निर्वाचन हुने गरेको भएपनि यसपटक भने राजनीतिक दलहरूले कुनै निर्णय गरेर चुनावी मैदानमा नहोमिएको तर वैचारिक आस्थाकै आधारमा विभाजित हुन नहुने बताएका छन्।
व्यवसायीहरूले निर्वाचनलाई स्वाभाविक लोकतान्त्रिक प्रक्रिया भन्दै सबै पक्षलाई पारदर्शी, निष्पक्ष र व्यवसायीको हितलाई केन्द्रमा राखेर प्रतिस्पर्धा गर्न आग्रह गरेका छन्। निर्वाचनपछि संघलाई सबै व्यवसायीहरूको साझा संस्थाका रूपमा थप सशक्त बनाउनु आवश्यक रहेको व्यवसायीहरूले बताउँदै आएका छन्।
व्यवसायीहरूको हकहित संरक्षणका लागि स्थापित संघको आगामी नेतृत्व कसले सम्हाल्ने भन्ने चासो बढ्दै जाँदा असार २७ गतेको निर्वाचनलाई इटहरीको व्यावसायिक क्षेत्रले विशेष महत्वका साथ हेरिरहेको छ।
Discussion about this post