इटहरी : दुर्घटनामा परी घाइते भएका नेपाल टेलिभिजन इटहरी च्यानलका कर्मचारी रवीन्द्रकुमार चौधरीलाई नयन मिडिया फाउन्डेसनले दुर्घटना बीमाअन्तर्गत प्राप्त ३२ हजार २ सय ५५ रुपैयाँ हस्तान्तरण गरेको छ।
बुधबार च्यानलको कार्यालयमा आयोजित कार्यक्रममा फाउन्डेसनका अध्यक्ष पवन अधिकारी, निर्देशक माधव सुवेदी तथा बीमा संयोजक देवराज पुरीले संयुक्त रूपमा चौधरीलाई बीमा दाबीबापतको रकम प्रदान गरेका हुन्।
कार्यक्रममा नेपाल टेलिभिजन इटहरी च्यानलका प्रमुख वसन्त रुपाखेतीले दुर्घटनापछि प्राप्त बीमा रकमले घाइते सञ्चारकर्मीलाई आर्थिक राहत मिलेको बताए।
उनले सञ्चारकर्मीको सुरक्षालाई प्राथमिकतामा राख्दै नयन मिडिया फाउन्डेसनले सञ्चालन गर्दै आएको निःशुल्क दुर्घटना बीमा कार्यक्रम उदाहरणीय रहेको उल्लेख गरे।
फाउन्डेसनका बीमा संयोजक पुरीका अनुसार ‘कोशी एक्सिलेन्स अवार्ड’को अवसरमा प्रत्येक वर्ष सुनसरीमा क्रियाशील सञ्चारकर्मीहरूको निःशुल्क दुर्घटना बीमा गरिँदै आएको छ।
यस वर्ष मात्रै जिल्लाका ३१४ जना सञ्चारकर्मी यस योजनामा आबद्ध भएका छन्।
फाउन्डेसनले सञ्चारकर्मीको सुरक्षा, सामाजिक उत्तरदायित्व र पेशागत मनोबल अभिवृद्धि गर्ने उद्देश्यले दुर्घटना बीमा कार्यक्रम सञ्चालन गर्दै आएको जनाएको छ।
दुर्घटनामा परेका पत्रकार तथा सञ्चारकर्मीलाई तत्काल आर्थिक राहत उपलब्ध गराउने यो कार्यक्रम सञ्चार क्षेत्रका लागि प्रभावकारी सामाजिक सुरक्षा अभियानका रूपमा स्थापित हुँदै गएको फाउन्डेसनको विश्वास छ।
Discussion about this post