इटहरी : सुनसरीको देवानगन्ज गाउँपालिका–३ कप्तानगन्ज गोलीकाण्डमा गम्भीर घाइते भएका १८ वर्षीय अमित यादवलाई घटना भएको पाँच दिनपछि थप उपचारका लागि काठमाडौं लगिएको छ।
देवानगन्ज–३ निवासी यादवलाई बिहीबार साँझ नेपाली सेनाको स्काई ट्रकमार्फत विराटनगरस्थित नोबेल शिक्षण अस्पतालबाट काठमाडौंस्थित ट्रमा सेन्टर पठाइएको हो। उनको बायाँ हात र कोखामा गोली लागेको थियो।
चिकित्सकले शल्यक्रियामार्फत शरीरभित्रको गोली निकाले पनि अवस्था गम्भीर रहेकाले उनी भेन्टिलेटरमा उपचाररत थिए।
मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार स्वास्थ्यमा अपेक्षित सुधार नआएपछि र अवस्था जटिल बन्दै गएपछि परिवारको सहमतिमा थप उपचारका लागि काठमाडौं रिफर गरिएको हो।
चिकित्सकका अनुसार विराटनगरमा उपलब्ध उपचारबाट उनको बायाँ हात जोगाउन सम्भव नभएको निष्कर्ष निकालिएको छ। उनी गएको आइतबार राति गोली लागेर घाइते भएका थिए।
देवानगन्ज–३ कप्तानगन्जमा दुई पक्षबीचको विवाद हिंसात्मक बनेपछि अवस्था नियन्त्रणमा लिन गत आइतबार राति सशस्त्र प्रहरीले गोली चलाएको थियो।
घाइतेमध्ये देवानगन्जका २५ वर्षीय ओमप्रकाश मेहताको घटनास्थलमै मृत्यु भएको थियो भने देवानगन्जकै २२ वर्षीय जयप्रकाश मेहताको बिहीबार (आज) उपचारकै क्रममा विराटनगरस्थित न्यूरो अस्पतालमा निधन भएको छ।
हाल गोली लागेर घाइते भएका अन्य सात जनाको विराटनगरका विभिन्न अस्पतालमा उपचार भइरहेको प्रहरीले जनाएको छ।
Discussion about this post